Vjelja e ullirit për vitin 2026 pritet të sjellë një prodhim më të lartë krahasuar me një vit më parë, pavarësisht thatësirës së tejzgjatur. Në zonën e Elbasanit, kultivuesit shprehen se cikli biologjik i bimës, së bashku me shërbimet e kryera në ullishte, pritet të ndikojnë në rritjen e prodhimit.
Vjelja e ullirit pritet të nisë në fund të muajit tetor për disa zona prodhimi dhe në muajin nëntor në mbarë vendin. Sipas kultivuesve në zonën e Elbasanit, pritshmëritë për këtë sezon janë për një prodhim më të lartë, edhe pse kushtet klimatike kanë qenë të vështira.
Agron Çakalli, drejtues i Federatës Bujqësore të Elbasanit (F.E.B.) pohoi për Monitor se cikli biologjik i bimës ka ndikuar në shtimin e prodhimit. Sipas tij, pavarësisht vështirësive shërbimet e fermerëve ndaj ullishteve nuk kanë munguar. Megjithatë, ai evidenton mungesën e mekanizimit si një prej faktorëve që vijon të pengojë rritjen e mëtejshme të prodhimit.
Rritja e pritshme e prodhimit pritet të shoqërohet me presion për uljen e çmimit në grumbullim. Grumbulluesit parashikojnë që çmimi i vajit të ullirit këtë sezon të jetë më i ulët krahasuar me vitin e kaluar.
Nga fabrikat e përpunimit, për vitin 2025 vaji i ullirit u grumbullua me çmim 700 deri 720 lekë për litër. Ndërsa në 2024, çmimi mesatar i grumbullimit të vajit të ullirit u luhat në vlerat 620 deri në 630 lekë për litër, nën kufirin prej 650 lekë për litër.
Në tregun e pakicës nga fermeri për konsumatorin vaji i ullirit u shit me 800 lekë për litër.
Agron Çakalli thotë se në shtëpitë e fermerëve ka një sasi të konsiderueshme vaj stok të pashitur, për shkak të çmimit më të lartë të kërkuar prej fermerëve.
Në gati tre dekada, sipas të dhënave të INSTAT nga 1998 deri në vitin 2025, rezulton se ulliri ka pasur luhatje të ndjeshme, si në prodhim dhe në rendiment.
Në 2025 sipas të dhënave të INSTAT u prodhua një sasi prej 143,3 mijë ton ullinj. Krahasuar me 2024, prodhimi i ullinjve ra me 2.2%. Ndërsa rendimenti nga 15.2 kg për rrënjë era në 14.4 kg për rrënjë.
Në gati 3 dekada sasia më e lartë e prodhimit të ullinjve u arrit në vitin 2022, me një sasi prej 157,7 mijë ton ullinj apo 43% shumë se viti paraardhës. Rendimenti i prodhimit ishte 17.2 kg/rrënjë apo 4.7 kg për rrënjë më shumë sesa në 2021.
Përveç 2022 sasia e lartë e prodhimit të ullinjve është arritur edhe në 2012, sidomos pas masave për subvencione të marra nga qeveria nga viti 2009 deri në vitin 2013. Në 2012 u prodhuan 108 mijë ton ullinj, me rritje 65% krahasuar me 2011.
Në 2023 sasia e prodhuar e ullinjve arriti në 117,6 ton ullinj. Krahasuar me 2022 prodhimi i ullinjve ra 25%. Rënie shënoi edhe rendimenti i prodhimit me 4.8 kg për rrënjë në 2023 në raport me vitin 2022. Në 2024 sipas të dhënave të INSTAT u prodhuan 146,7 mijë ton ullinj. Krahasuar me 2023 sasi e prodhimit u rrit rreth 25%. Në 2024 rendimenti i prodhimit të ullirit arriti 15.2 kg për rrënjë. Në raport me 2023 rendimenti ishte me rënie 2.8 kg për rrënjë.
Marrë nga Monitor
