Një operacion antidrogë është organizuar në vendin tonë, në bashkëpunim me autoritetet italiane.
Nga ky operacion janë vënë në pranga dy shqiptarë të cilët janë pjesëtarë të grupeve kriminale të implikuara në trafikimin e Kokainës nga Amerika Latine në Itali, gjatë periudhës 2018-2024.
Të arrestuarit janë 34-vjeçari, Juljan Kollçaku dhe dhe 30-vjeçari, Maksim Ndoci.
Në lidhje me këtë operacion SPAK ka dhënë detaje të reja ndërsa theksoi se janë arretuar 25 persona mes të cilëve edhe dy shqiptarët. • Ndërkohë 23 personat e tjerë janë arrestuar në Itali. Sipas reagimit të SPAK arrestimet janë zhvilluar në Toskanë, Kalabri, Lazio, Puglia, Campania, Lombardi, Veneto dhe Liguria.
Hetimet ndaj rrjetit kriminal shqiptar u iniciuan nga Prokuroria e Firences në Itali, në vitin 2021 ku më pas u krijua ekipi i parë i përbashkët hetimor mes autoriteteve italiane dhe shqiptare. Përmes përgjimeve e shkëmbimeve të informacionit mes organizatave kriminale në SkyECC u bë i mundur finalizimi i operacionit.
Më tej bëhet me dije se grupi i strukturuar kriminal ishte aktiv si furnizues me shumicë i drogës në tregjet italiane. SPAK thekson se dërgesat e drogës dërgoheshin nga Amerika e Jugut në kontejnerë, përmes porteve italiane dhe në vende të tjera evropiane. Kontejnerët ruheshin në portet e mbërritjes, ku ekipet e posaçme kujdeseshin për rikuperimin e lëndës narkotike dhe nxjerrjen e dërgesave nga zonat portuale, për t’i vënë më pas në dispozicion të grupeve kriminale.
Për të lehtësuar operacionet e identifikimit dhe gjetjes së kokainës, grupi i strukturuar kriminal përdorte pajisje radiolokalizimi, ndërsa lënda fshihej brenda kontejnerëve të ngarkuar me mbulesë frutash ekzotike ose në hapësirat e posaçme të krijuara për këtë qëllim.
Nga hetimet e kryera është bërë e mundur kapja e mbi 2 ton kokainë, 45 kg hashash, 20 kg marijuanë nga e cila, grupi kriminal do të kishte përfituar rreth 70 milionë euro.
Gjithashtu lidhur me operacionin ka reaguar edhe Guardia di Finanza. Ata bëjnë me dije se u përfshinë 200 ushtarë të GdF, së bashku me njësitë e qenve që ky operacion të dilte me sukses ndërsa kanë kryer dhjetëra kontrolle.
Mësohet se kërkimet janë ende në vazhdim, ku përfshihen edhe biznese në Firence dhe i atribuohen të dyshuarve shqiptarë. Gjatë hetimeve të kryera nga njësia e policisë ekonomike-financiare të Pizës dhe nga Scico, u konstatuan marrëdhënie kriminale për furnizim me lëndë narkotike midis bandave Ndrangheta dhe Camorra dhe shoqatës kriminale shqiptare, që vepronte midis Italisë, por me degë në Belgjikë, Shqipëri, Francë, Gjermani, Ekuador dhe Kolumbi.
