Aleanca Kosovare e Bizneseve denoncoi autoritetet doganore të Kosovës se kanë bllokuar disa ngarkesa me produkte ushqimore nga Shqipëria.
“Aleanca Kosovare e Bizneseve (AKB), duke u bazuar në ankesën zyrtare të pranuar nga Dhoma e Tregtisë dhe Industrisë Tiranë, shpreh shqetësim të thellë për situatën e krijuar në pikën kufitare Morinë, ku disa ngarkesa me produkte ushqimore po mbahen të bllokuara për një periudhë të gjatë dhe të pajustifikueshme,” deklaroi Aleanca përmes një komunikate zyrtare.
AKB zbuloi se kamionët e bllokuar i përkasin kompanisë AGS shpk. Kjo kompani është themeluar nga Nikolin Jaka së bashku me bashkëshorten Alma Tafani dhe aktualisht aksionet e saj zotërohen 100 për qind nga zonja Tafani. Aleanca Kosovare e Bizneseve tha se ankesën për bllokimin e ka marrë nga Dhoma e Tregtisë dhe Industrisë së Tiranës.
“Sipas të dhënave zyrtare, kompania AGS shpk (Shqipëri) ka aktualisht 5 kamionë të ndaluar me produkte UHT, të destinuara për tregun e Kosovës përmes kompanive: Albi Commerce (UHT Grata), Liridoni Distribution (UHT Cremosos), Dualos (UHT Dua Barista). Ndalimi i këtyre ngarkesave ka filluar që nga data 20 prill 2026, me arsyetim kryerjen e analizave fiziko-kimike dhe verifikimin e përputhshmërisë me etiketimin. Megjithatë, deri më sot koha e pritjes ka arritur deri në 15 ditë, nuk ka rezultate përfundimtare zyrtare dhe nuk ka asnjë sqarim institucional për vonesat. AKB thekson se afatet standarde për analiza të tilla janë rreth 5 ditë pune, dhe tejkalimi i tyre përbën mungesë të theksuar të efikasitetit dhe transparencës institucionale,” tha Aleanca.
Sipas saj, ky nuk është thjesht kontroll, por një barrierë e pastër.
“AKB vlerëson se, në mungesë të çdo indikacioni për rrezik mikrobiologjik apo toksikologjik, ndalimi i zgjatur i produkteve UHT është joproporcional dhe po shndërrohet në një barrierë tregtare të panevojshme. Kjo situatë po prodhon pasoja ekonomike të drejtpërdrejta: Rritje të kostove për bizneset; Shpenzime të larta për mirëmbajtjen e kamionëve frigoriferikë (24/7); Rrezik për dëmtim të produkteve;Vonesa në furnizim të tregut; Rritje të çmimeve për konsumatorët,” vijon komunikata zyrtare.
AKB thekson se kostoja e kësaj bllokade po transferohet drejtpërdrejt te qytetari i Kosovës dhe i kërkoi ministrisë së Bujqësisë dhe Agjencisë së Ushqimit dhe Veterinarisë, publikimin urgjent të rezultateve të analizave si dhe lirimin e menjëhershëm të ngarkesave në mungesë të rrezikut të provuar.
AKB paralajmëron se vazhdimi i kësaj situate rrezikon dëmtimin e bashkëpunimit ekonomik Kosovë–Shqipëri si treg Kombëtar dhe Vendor dhe kjo shkakton rritjen e mëtejshme të çmimeve si dhe dobësimin e konkurrueshmërisë së tregut.
Marrë nga Kapitali.al
