Një rast i rëndë dyshohet se ka ndodhur në zbatim të skemës së kredive të buta të Bashkisë Tiranë, me përfitues djalin e administratores së Njësisë Administrative Nr.1, znj. Trëndelina Bala (Jaku).
Sipas një denoncimi të bërë nga një qytetar, zonja Bala, duke përdorur pozitën zyrtare dhe në bashkëpunim me strukturat e bashkisë, ka ndihmuar të birin, Leandro Edmond Jaku, që të përfitojë në mënyrë të padrejtë një kredi të butë nga programi i strehimit që synon të ndihmojë familjet me të ardhura të ulëta.
Në një vend ku qindra qytetarë presin prej vitesh në radhë për të hyrë në këtë skemë jetike, ky favorizim bie erë abuzimi me detyrën dhe klientelizëm. “Hallexhiu i Njësisë 1 ka nxituar të sigurojë strehimin për të birin në grahmat e fundit të pushtetit, ndërsa shumë familje të tjera mbeten pa një strehë mbi kokë,” thuhet në denoncimin e bërë publikisht.
Pyetjet që kërkojnë përgjigje:
- Si është përzgjedhur Leandro Edmond Jaku në listën e përfituesve?
- Cilat janë të ardhurat reale dhe statusi social i tij?
- A ka pasur konflikt interesi në vendimmarrjen për këtë përfitim?
- Kush janë anëtarët e komisioneve përzgjedhëse dhe a janë verifikuar lidhjet e tyre me përfituesin?
Në një reagim të gjerë në rrjet, qytetarët shprehen të indinjuar dhe kërkojnë hetim të menjëhershëm nga institucionet përkatëse, si dhe transparencë të plotë për përfituesit aktualë dhe kriteret reale të ndjekura në proces.
Marrë nga Publik.al
