Sipas një projektligji të propozuar së fundmi, të gjithë artistë e punësuar në institucionet publike kulturore të vendit mund të përfitojnë trajtim financiar pasi të ndërpresin veprimtarinë artistike në skenë.
Në këtë projektligj përfshihen të gjithë akrobatët, balerinët dhe valltarët të cilët do të mund të përfitojnë trajtim financiar që në moshën 47-vjeçare, ndërsa këngëtarët solistë dhe të korit, në moshën 57-vjeçare.
Sa i takon masës së trajtimit financiar do të jetë 70% e pagës bruto mujore për një periudhë 5-vjeçare dhe deri në datën e lindjes së të drejtës për të marrë pensionin e pleqërisë, pension invaliditeti ose pension familjar do të jetë 50% e pagës bruto.
Ky draft ka qëllim të trajtojë financiarisht artistët nga periudha e përfundimit të karrierës në skenë deri në ditën kur do të marrin pensionin, duke i ofruar siguri ekonomike dhe kushte për ruajtjen dhe transmetimin e përvojës së tyre profesionale.
Sipas projektligjit parashikohet edhe mundësia e angazhimit të tyre, me kërkese të institucionit pa shpërblim shtesë, ku përfshihen veprimtari artistike, kulturore apo trajnuese.
Projektligji është hedhur për konsultim publik dhe pritet të hyjë në fuqi nga data 1 janar e viti 2027. Kostoja parashikohet të jetë 50.8 milion lekë dhe do të financohet nga Buxheti i Shtetit.
Marrë nga Newsbomb.al
