Futbollisti i Kosovës Albion Rrahmani u pajis me pasaportën shqiptare, një dekret i firmosur dhe miratuar nga presidenti i Republikës së Shqipërisë, Bajram Begaj. Një hap i rëndësishëm ky që e ndihmon sulmuesin shqiptar të Kosovës që të mos konsiderohet ekstrakomunitar në Serie A, aty ku do të luajë për Venezian.
Një vendim i tillë ka sjellë reagimin e Tefik Osmanit, i cili mban rolin e përgjegjësit të skautizmit pranë Federatës Shqiptare të Futbollit.
Përmes një “letre” publike në një postim në “Story” në profilin e tij në Instagram, ai i drejtohet Begajt se pse lojtarëve të Kosovës u përshpejtohet procedura për t’u pajisur me dokumentacionin përkatës, ndërsa talentet shqiptare duhet të presin VKM-në.
Postimi i Tefik Osmanit:
“Zoti President i Republikës,
Po ju drejtohem publikisht, jo për një favor, por për një përgjigje që lidhet drejtpërdrejt me të ardhmen e futbollit shqiptar.
FSHF-ja ka dorëzuar dokumentacionin për rreth 10 djem dhe vajza me potencial të madh, të cilët mund të përfaqësojnë Shqipërinë në ekipet kombëtare të moshave. Përgjigjja që marrim është se ka ndryshuar ligji dhe duhet të presim VKM-në.
Dua të jem shumë i qartë: ne si FSHF jemi plotësisht pro që lojtarët me origjinë nga Kosova të pajisen me pasaportë shqiptare. Madje kemi punuar dhe kemi bërë marrëveshje me Italinë pikërisht që lojtarët shqiptarë të mos konsiderohen ekstrakomunitarë.
Por pikërisht për këtë arsye, lind një pyetje e fortë:
Si është e mundur që procedurat për një lojtar të Përfaqësueses së Kosovës, si Albion Rrahmani, mund të ecin dhe të përfundojnë, ndërkohë që dokumentacioni i lojtarëve dhe lojtareve që FSHF-ja po përpiqet t’i afrojë me Kombëtaret e Shqipërisë qëndron gjithmonë në pritje?
Nuk kemi asgjë kundër Rrahmanit apo lojtarëve të Kosovës. Përkundrazi, kjo është një çështje që ne e mbështesim. Por kërkojmë që i njëjti seriozitet, e njëjta shpejtësi dhe e njëjta vëmendje t’u kushtohet edhe talenteve që mund të veshin fanellën kuqezi.
Sepse këtu nuk po flasim për dokumente që mund të presin pafundësisht. Po flasim për fëmijë dhe të rinj që kanë një moshë, një cikël kombëtareje dhe një moment të caktuar në zhvillimin e tyre.
Nëse shteti mund të gjejë një zgjidhje kur bëhet fjalë për një lojtar që përfaqëson Kosovën, pse nuk mund të gjendet një zgjidhje me të njëjtën urgjencë për lojtarët që presin të përfaqësojnë Shqipërinë?
Sepse në fund, rrezikojmë diçka shumë më të madhe se një dosje të vonuar: rrezikojmë të humbasim talente që Shqipëria i ka gjetur, i ka ndjekur dhe i dëshiron.
Dhe do të ishte paradoksale që talentin ta humbnim jo në fushën e futbollit, por në pritje të një procedure administrative.
Marrë nga Newsbomb.al
