Bashkimi Evropian ka vlerësuar se Shqipëria ka përmbushur kriterin për mbylljen e Kapitullit 20, që mbulon politikat e sipërmarrjes dhe industrisë.
Megjithatë, pozicioni zyrtar i BE-së evidenton një sërë detyrimesh që vendi duhet të përmbushë gjatë procesit të integrimit, nga ndryshimi i legjislacionit për investimet deri te lufta kundër korrupsionit dhe zhvillimi i qëndrueshëm i turizmit.
Në dokumentin e datës 9 tetor, që përcakton qëndrimin e përbashkët të BE-së për Kapitullin 20, Brukseli vlerëson përafrimin e Shqipërisë me politikat evropiane për ndërmarrjet e vogla dhe të mesme, si dhe miratimin e Strategjisë për Zhvillimin e Biznesit dhe Investimeve.
Sipas dokumentit, kjo strategji është kryesisht në përputhje me orientimet e politikës industriale evropiane, ndërsa Shqipërisë i kërkohet të monitorojë zbatimin e saj dhe të raportojë rregullisht mbi përparimin.
Megjithatë, një nga kërkesat më konkrete lidhet me legjislacionin për investimet strategjike.
BE-ja i kujton Shqipërisë se duhet të shfuqizojë deri në fund të vitit ligjin për investimet strategjike dhe të miratojë një ligj të unifikuar për investimet, plotësisht në përputhje me legjislacionin evropian.
Sipas Brukselit, kuadri i ri duhet të krijojë një regjim gjithëpërfshirës investimesh, të nevojshëm për zhvillimin e partneriteteve publike-private dhe bashkëpunimit mes bizneseve.
Një tjetër fushë ku kërkohet vëmendje është turizmi. BE-ja njeh përparimin e Shqipërisë në përafrimin e politikave sektoriale, por kërkon përmirësimin e të dhënave për turizmin dhe monitorimin e flukseve turistike.
Dokumenti thekson nevojën për mbrojtjen e mjedisit, pasurive natyrore dhe kulturore, si dhe për garantimin që zhvillimi i turizmit të sjellë përfitime gjithëpërfshirëse për komunitetet lokale.
Përafrim i mëtejshëm kërkohet edhe në ndërtim, miniera, lëndë të para kritike, mbrojtje dhe industrinë e çelikut. Për lëndët e para kritike, BE-ja nxit zbatimin e rregullores përkatëse evropiane përpara anëtarësimit.
Pavarësisht përmbushjes së kriterit për mbylljen e kapitullit, Brukseli rikthen vëmendjen edhe te korrupsioni dhe ekonomia informale.
BE-ja kërkon forcimin e institucioneve dhe strategjive kundër korrupsionit, veçanërisht përmes shërbimeve publike të digjitalizuara, transparente dhe të përgjegjshme, përfshirë regjistrimin e pronës, si dhe garantimin e transparencës në prokurimet publike dhe mbështetjen për bizneset.
Dokumenti përcakton se, në këtë fazë, Kapitulli 20 nuk kërkon negociata të mëtejshme. Megjithatë, monitorimi i përafrimit ligjor dhe zbatimit të reformave do të vazhdojë përgjatë negociatave, ndërsa BE-ja rezervon të drejtën t’i rikthehet kapitullit nëse është e nevojshme.
Marrë nga Reporteri.net
