Deputetja e Partisë Socialiste, Marjana Koçeku, njoftoi të dielën largimin e saj nga grupi parlamentar i mazhorancës, duke deklaruar se do të vazhdojë mandatin si deputete e pavarur, në një moment kur protestat kundër qeverisë po zgjerohen në Tiranë dhe qytete të tjera të vendit.
Në një postim në Facebook, Koçeku tha se vendimi i saj udhëhiqej nga bindjet personale dhe vlerat që, sipas saj, i paraprijnë angazhimit partiak.
“Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojnë kufijtë,” shkroi ajo.
Koçeku nuk dha detaje të mëtejshme mbi arsyet e largimit nga grupi parlamentar socialist, ndërsa Partia Socialiste nuk kishte reaguar publikisht deri në momentin e publikimit të këtij lajmi.
Dorëheqja nga grupi parlamentar vjen në një periudhë tensioni politik për qeverinë e kryeministrit Edi Rama, e cila po përballet me protesta të përditshme kundër projektit turistik në zonën e mbrojtur të Zvërnecit dhe ishullin e Sazanit, por edhe me kërkesa më të gjera për llogaridhënie, transparencë dhe luftë kundër korrupsionit.
Protestat, të njohura nga organizatorët si “Revolucioni i Flamingove”, kanë mbledhur dhjetra mijëra pjesëmarrës gjatë javëve të fundit dhe janë shndërruar nga një kauzë mjedisore në një platformë më të gjerë kritike ndaj qeverisë.
Largimi i Koçekut përbën një nga çarjet e para publike në radhët e mazhorancës që prej përshkallëzimit të protestave, megjithëse mbetet e paqartë nëse vendimi i saj lidhet drejtpërdrejt me zhvillimet e fundit politike.
Vendimi i saj u përshëndet nga piktori dhe aktivisti Adrian Paci, i cili e cilësoi largimin e Koçekut si një shenjë se pushteti nuk mund të jetë qëllim në vetvete.
“Dorëheqja e Marjana Koçekut nga grupi parlamentar i PS asht një sinjal i fortë se pushteti nuk mundet me qenë qëllim në vetvete e se reflektimi, vetëpërmbajtja e tërheqja nuk duhen konsiderue si dobësi, por si bashkëudhëtarë të detyrueshëm sidomos për ata të cilët vullneti i qytetarëve i ka mveshë me pushtet,” shkroi Paci në rrjetet sociale.
Sipas tij, zhvillimet e fundit tregojnë nevojën për “një pakt të ri mes shoqnisë dhe elitës politike”, i cili do të kërkonte rregulla të reja që garantojnë qarkullimin e elitave politike si kusht për stabilitet dhe ndryshim. Paci e cilësoi vendimin e Koçekut si “kurajoz” dhe shprehu shpresën se ai do të pasohet nga figura të tjera politike.
Si deputete e pavarur, Koçeku do të vazhdojë të mbajë mandatin në Kuvend, por pa qenë pjesë e grupit parlamentar të Partisë Socialiste.
Marrë nga Reporter.al
