Parlamenti hungarez ka miratuar një ligj që krijon një superagjenci të posaçme për hetimin e pasurive të oligarkëve dhe kompanive që kanë përfituar kontrata të favorshme nga shteti.
E pagëzuar si Zyra Kombëtare për Rekuperimin e Aseteve (NVVH), agjencia do të ketë kompetenca të gjera për të hetuar kompanitë që kanë përfituar nga kontratat shtetërore, përfshirë bizneset e lidhura me personazhe të njohur si oligarkë në Hungari.
Një prej kompanive që pritet të kalojë nën lupën e NVVH-së është grupi 4iG, pronari i One Albania, i cili është akuzuar drejtpërdrejt nga kryeministri dhe ministra hungarezë si një prej strukturave që qëndrojnë në themel të oligarkisë në vend.
Ligji për krijimin e Zyrës së Rekuperimit të Aseteve
Sipas mediave hungareze, NVVH-së i janë dhënë kompetenca të jashtëzakonshme. Në bazë të Aktit XXXIV të vitit 2026, zyra mund të hetojë prokurimet publike, subvencionet shtetërore, koncesionet, fondet e Bashkimit Evropian, zinxhirët kontraktualë, si dhe marrëdhëniet e pronësisë përfituese.
Agjencia mund të vendosë kompani nën mbikëqyrjen e saj për mbrojtjen e aseteve publike, si dhe të kontrollojë librat kontabël, kontratat dhe të dhënat financiare. Në kushte të caktuara, ajo mund të kundërfirmosë kontratat e kompanive nën hetim dhe madje të ndërhyjë në vendime të caktuara korporative.
Megjithatë, vendimet e paligjshme të zyrës mund të kundërshtohen në gjykatë dhe, në rast se shkaktohet dëm, shteti mund të jetë përgjegjës për kompensimin.
NVVH-ja do të ketë gjithashtu kompetenca për të kryer dhe drejtuar hetime, për të ngritur akuza dhe për të përfaqësuar prokurorinë publike. Kjo përbën një ndryshim të rëndësishëm, pasi në rastet që lidhen me pronën publike prek monopolin tradicional të prokurorisë në ndjekjen penale.
Ndërkohë, qeveria hungareze ka hapur konkursin për përzgjedhjen e personit që do të drejtojë Zyrën Kombëtare për Rekuperimin e Aseteve. Sipas mediave hungareze, deri më tani kanë aplikuar rreth 100 kandidatë për të marrë drejtimin e institucionit të ri, i cili është konceptuar si një mekanizëm kundër oligarkisë.
“Ditët në vijim nuk do të jenë thjesht për zgjedhjen e një kreu të ri shteti. Do të nisë procesi i përzgjedhjes së personit që do të ndërtojë një nga institucionet më të fuqishme të mbikëqyrjes dhe zbatimit të ligjit në dekada”, shkruajnë mediat hungareze.
Sipas tyre, besueshmëria e zyrës së re do të varet nga aftësia e saj për të goditur njëkohësisht shpërdorimin e fondeve publike dhe për t’i rezistuar çdo tundimi për përdorimin e saj si instrument të hakmarrjes politike.
Marrë nga Reuters
