Pak minuta pasi Keir Starmer dha dorëheqjen, BBC-ja ka ngritur hipotezat se kush mund të jetë kryeministri i ri i Britanisë së Madhe.
Starmer ka njoftuar se nominimet për pasardhësin e tij do të hapen pas dy javësh.
A do të ketë një kurorëzim të drejtpërdrejtë? Një numër në rritje deputetësh laburistë mendojnë se po. Favoriti absolut është Andy Burnham, pse do të kandidonte dikush kundër tij?
Wes Streeting ka deklaruar më parë se do të kandidonte. Por, interesant është fakti se disa nga aleatët e tij kanë pranuar gjithashtu se ai mund të mos e bëjë këtë. A mund t’i ofrohet atij një post i rëndësishëm nga Burnham?
Megjithatë, afati aktual lë të hapur mundësinë që dikush tjetër të hyjë në garë.
A mund të ndiejë dikush nga krahu i qendrës së djathtë nevojën për të nxitur një garë për drejtimin e partisë?
Megjithatë, shumica dërrmuese e parashikimeve janë se Andy Burnham do të bëhet së shpejti kryeministër.
Andy Burnham
Deputeti i Makerfield dhe ish-kryetari i Greater Manchester gëzon popullaritet të madh mes deputetëve laburistë, ndërsa sondazhet tregojnë se ai është politikani më i pëlqyer i Partisë Laburiste.
Andy Burnham u rrit në Aintree, në Merseyside, dhe e paraqet veten si një kandidat të krahut të majtë të partisë. Ai thotë se u frymëzua t’i bashkohej Laburistëve nga greva e minatorëve në vitet 1980.
Ai ishte deputet për zonën e Leigh nga viti 2001 deri në vitin 2017 dhe shërbeu në qeveritë e Tony Blair dhe Gordon Brown, duke e bërë një nga kandidatët më me përvojë në garë.
Wes Streeting
Wes Streeting dha dorëheqjen nga kabineti i Starmer në maj, duke deklaruar se “aty ku na duhet një vizion, kemi një boshllëk”.
Si sekretar i Shëndetësisë që nga viti 2024, ai konsiderohej si një nga komunikuesit më të aftë të kabinetit.
Në kujtimet e tij të botuara në vitin 2023, ai shkroi për rininë e kaluar në një banesë sociale në East End të Londrës, për vizitat te gjyshi i tij që vuante dënimin në burg për grabitje banke dhe për rritjen e tij si një i krishterë homoseksual.
Ai perceptohet si pjesë e krahut të djathtë të partisë, gjë që mund ta bëjë më pak të pëlqyer mes anëtarëve të saj, por gëzon mbështetje të fortë nga deputetët laburistë.
Angela Rayner
Angela Rayner u rrit në varfëri dhe e la shkollën në moshën 16-vjeçare pa asnjë kualifikim, por për një periudhë ishte gruaja më e fuqishme në politikën britanike.
Ajo dha dorëheqjen nga posti i zëvendëskryeministres, zëvendësdrejtuese e Partisë Laburiste dhe sekretare e Strehimit në vitin 2025, pasi pranoi se nuk kishte paguar mjaftueshëm taksa.
E njohur për mbështetjen që gëzon në krahun e majtë të partisë, ajo thotë se tani është shpallur e pafajshme për çdo shkelje nga autoriteti tatimor britanik, duke lënë të hapur mundësinë e një fushate për drejtimin e partisë.
Marrë nga BBC
