Presidenti serb, Aleksandër Vuçiç, duket se po interesohet dhe po punon për ta konsoliduar pushtetin e tij dhe për të shpallur zyrtarisht veten si komandant suprem i forcave të armatosura duke ndryshuar Ligjin për Ushtrinë, dhe si shef i policisë përmes ndryshimeve të personelit, shkruan të hënën e përditshmja austriake Österreich 24.
“Amendamenti i ligjit, të cilin parlamenti ndoshta do ta miratojë së shpejti, përcakton që Shefi i Shtabit të Përgjithshëm dhe oficerët kryesorë duhet të udhëheqin forcat e armatosura në përputhje me ligjin dhe me vendimet e presidentit. Në ligjin aktual, presidenti nuk përmendet në atë kontekst”, shkruan OE24. Megjithatë, ky supozim kontrolli nuk vlen vetëm për ushtrinë, sepse bazuar në ndryshimet e fundit të personelit në polici, mund të supozohet se policia tani do të jetë edhe nën kontrollin e plotë të kreut të shtetit, Vuçiç, shkruan e përditshmja.
OE24 përcjell vlerësimin e të përjavshmes politike të Beogradit, Radar, se “rruga drejt shndërrimit të policisë në një degë të Partisë Progresive Serbe, e cila filloi në vitin 2014, pothuajse ka mbaruar”.
Ndryshimet e fundit të personelit dëshmojnë se “të gjitha ndryshimet pasqyrojnë vetëm dëshirat e Vuçiqit”, raporton OE24 shkrimin e Radar dhe vlerëson se shembulli më i mirë i kësaj është kreu i njësisë speciale për mbrojtjen e ndërtesave, Marko Krichak, i cili do të ngrihet në detyrë, megjithëse ai u dallua veçanërisht për brutalitetin e tij në trajtimin e studentëve rebelë.
OE24 i bën jehonë vlerësimit të gjeneralit në pension Momir Stojanoviç se ndryshimi në ligj është “absurd” sepse Serbia është një vend me sistem parlamentar qeverisjeje.
“Ndoshta është kështu, por vetëm në letër. Sepse shumicës së njerëzve në Serbi u është bërë e qartë prej kohësh se asnjë vendim nuk mund të merret pa bekimin e presidentit”, vlerëson e përditshmja Österreich 24.
Marrë nga Österreich 24
