Presidenti Donald Trump ka njoftuar këtë të martë se ka anuluar çdo takim me zyrtarët iranianë, ndërsa vazhdon shtypja e protestuesve, duke lënë të kuptohet se dritarja e diplomacisë që ai pa të hapej disa ditë më parë, tashmë është mbyllur.
“Patriotë iranianë, VAZHDONI TË PROTESTONI – MERRNI NË DORË INSTITUCIONET TUAJA!!! Ruani emrat e vrasësve dhe abuzuesve. Ata do të paguajnë një çmim të lartë”, ka shkruar ai pak momente më parë në në platformën e mediave sociale Truth Social.
Mediat amerikane dhe të tjera ndërkombëtare e cilësojnë këtë si një mesazh se Presidenti e ka vendosur tashmë për të ndërhyrë në Iran.
Trump i inkurajoi protestuesit të vazhdonin demonstratat dhe tha se “ndihma është duke ardhur”. Një fjali që ka trazuar politikën ndërkombëtare, me shumë që aludojnë se regjimi teokratik në Teheran është në momentet e tij të fundit.
Ato i referohen shkrimit me shkronja kapitale që Donald Trump ka bërë, duke e krahasuar me rastet e mëpërparshme, dhe thonë se kërcënimet online me shkronja kapitale janë një tipar i njohur i stilit të udhëheqjes së këtij presidenti.
“Pasi premtoi të ndihmonte protestuesit iranianë, dhe me qindra – ndoshta mijëra – prej tyre tani të vdekur, Donald Trump duket se e ka vendosur. Është e vështirë ta shohësh atë duke u tërhequr tani”, raporton prestigjozja BBC.
Agjencia e Lajmeve të Aktivistëve të të Drejtave të Njeriut (HRANA) me seli në SHBA thotë se 1,847 protestues janë vrarë në Iran që nga fillimi i demonstratave më 28 dhjetor. Grupi i të drejtave të njeriut shton se nëntë prej tyre janë nën moshën 18 vjeç, 135 janë personel i lidhur me qeverinë dhe nëntë janë civilë. Kjo, thonë ata, e çon numrin total të të vrarëve në 2,000.
Edhe CNN amerikan shkruan se Presidenti Donald Trump nuk beson më se bisedimet do të ishin të frytshme me Iranin. Ai përfundoi mesazhin e tij në platformën sociale duke shkruar “MIGA”, ose Ta Bëjmë Iranin Përsëri të Madh.
Marrë nga CNN
