Zyra e prokurorit të Milanos ka zbuluar një nga skandalet më të mëdha të mbikëqyrjes kibernetike në Evropë: një organizatë që dyshohet se ka hyrë në bazat e të dhënave kombëtare italiane, siç është sistemi SDI (Sistema di Indagine) i policisë dhe ka tregtuar informacione në emër të kompanive, konsulentëve dhe politikanëve.
Sipas Politico, fokusi është tek Equalize srl, një kompani e themeluar nga ish-karabinieri Carmine Gallo dhe që punon me Mercury Advisors, një firmë komunikimi strategjik me lidhje me biznesmenin Enrico Pazzali, ish-drejtues i qendrës së ekspozitave të Milanos (Fondazione Fiera Milano).
Autoritetet besojnë se Gallo dhe bashkëpunëtori i tij i ngushtë Nunzio Samuele Calamucci ishin trutë ideatorë të operacionit. Nëpërmjet aksesit të paligjshëm, rrjeti mori qindra mijëra të dhëna – duke përfshirë të dhëna financiare, tatimore dhe mjekësore të figurave publike. Ky informacion u shit më vonë palëve të treta me qëllim shantazhi ose manipulimi politik.
Si funksionoi rrjeti?
Grupi dyshohet se vepronte si një “shërbim privat inteligjence”. Nëpërmjet kontakteve të brendshme në forcat e sigurisë dhe shërbimet publike, personat e përfshirë merrnin kode aksesi në sistemet qeveritare. Atje, ata identifikonin dhe nxirrnin dosje mbi individë të përzgjedhur, politikanë, gazetarë, biznesmenë – të cilat më pas i “paketonin” në raporte në formën e “raporteve konsulente” për kompanitë dhe lobet.
Hetimet zbuluan biseda në të cilat Calamucci thotë se ka një “hard disk me 800,000 skedarë SDI”, ndërsa prokurorët sekuestruan servera me të dhëna të ndjeshme nga zyrat e Equalize.Klientët e rrjetit përfshinin, sipas mediave italiane, firma të marrëdhënieve me publikun, këshilltarë financiarë dhe figura politike që kërkonin “informacion të synuar” mbi kundërshtarët ose bashkëpunëtorët.
Implikimet politike dhe përfshirja e biznesit
Rasti prek qarqe të larta të ekonomisë italiane. Enrico Pazzali, i cili deri vonë mbante role publike në Milano dhe merrte pjesë në komitetet e zhvillimit të qytetit, duket se ka bashkëpunuar profesionalisht me figurat e Equalize përmes Mercury Advisors. Edhe pse ai vetë mohon çdo përfshirje, hetuesit po shqyrtojnë nëse shërbimet e tij janë përdorur për “mbulim operacional” të rrjetit.
Politico thekson se rasti ngre “pikëpyetje serioze në lidhje me transparencën në fushën e komunikimeve politike në Itali”, pasi kompanitë e lobimit duket se kanë përdorur të dhëna që kanë ardhur nga akses i paligjshëm.
Akuzat dhe hapat e mëtejshëm
Të arrestuarit përballen me akuza të rënda, si; formim dhe pjesëmarrje në një organizatë kriminale, akses i paligjshëm në sistemet kompjuterike, rrjedhje e të dhënave konfidenciale, trafikim informacioni dhe zhvatje.
Zyra e prokurorit të Milanos ka kërkuar tashmë bashkëpunimin e shërbimit italian të inteligjencës (AISI) për të hetuar nëse një pjesë e të dhënave është trafikuar jashtë Italisë. Ministria e Brendshme ka kryer gjithashtu një kontroll sigurie të të gjitha bazave të të dhënave kombëtare, pas indikacioneve se shkelja mund të ketë zgjatur për më shumë se tre vjet.
Autoritetet italiane e kanë quajtur rastin një “kërcënim për demokracinë dhe besimin në institucionet shtetërore”. Zbulimi i një operacioni të organizuar të spiunazhit kibernetik, me lidhje me ish-oficerë policie dhe kompani komunikimi, ka shkaktuar një tërmet politik në Milano – dhe frikë se praktika të ngjashme mund të jenë përdorur në nivel evropian.
Marrë nga Politico.eu
