Ish-kryeministri i Shqipërisë, Pandeli Majko ditën e sotme ka bërë thirrje për t’u bashkuar me studentët shqiptarë në Maqedoninë e Veriut të cilët protestojnë që të zhvillojnë provimet e tyre në gjuhën amtare, gjuhën shqipe.
Përmes një postimi të bërë në Facebook-un e tij, Majko bën thirrje publike që qytetarët të bashkohen në protestën e studentëve shqiptarë të cilët kërkojnë përmbushjen e të drejtës së tyre, më të vjetrën në botë, për të përdorur gjuhën e tyre amtare.
“Në Maqedoninë e Veriut ka nisur një lëvizje studentore, e djemve dhe vajzave të shqiptarisë! Studentët shqiptarë kërkojnë të drejtën më të vjetër në botë, atë të gjuhës amëtare! Ata kërkojnë që gjuha e provimit në jurisprudencë të jetë në gjuhën shqipe! Të studiosh shqip dhe të japësh provimin në maqedonisht, fyen inteligjencën më naive!” shkruan Majko në postimin e bërë.
Më tej, Majko thekson se askush në Maqedoninë e Veriut, madje as vetë kryeministri nuk ka fuqinë që të ndalojë përdorimin e gjuhës shqipe nga shtetasit shqiptarë. Ndërsa shton se shqiptarët nuk mund të kthehen në të shkuarën e errët të Jusgosllavisë së dikurshme.
Në përmbyllje të reagimit të tij, ish-kryeministri i Shqipërisë shkruan se revolta e studentëve dëshmon qartazi refuzimin e një sistemi që ka humbur kontrollin mbi zbatimin e ligjit i cili për shqiptarët e RM-së, njeh si gjuhë amtare, gjuhën shqipe.
“Protesta e studentëve shqiptarë në Maqedoninë e Veriut është refuzim i një sistemi që e ka humbur kontrollin mbi vetveten dhe zbatimin e ligjit! Kjo që po ndodh, është më shumë se një revoltë studentësh! Ajo është një betejë për të ardhmen. Protestoni sot! Ajo refuzon luftën nesër!” përmbyll reagimin e tij.
Marrë nga Newsbomb.al
