Administrata Tatimore ka vënë në dispozicion një asistent virtual të quajtur “Muçi”, i cili synon të lehtësojë komunikimin me tatimpaguesit dhe t’u japë përgjigje pyetjeve dhe shqetësimeve të bizneseve lidhur me detyrimet dhe procedurat tatimore. Për të përdorur shërbimin, qytetarët dhe përfaqësuesit e bizneseve duhet fillimisht të identifikohen përmes llogarisë së tyre në e-Albania.
Asistenti virtual prezantohet përmes një ndërfaqeje komunikimi online, ku përdoruesit mirëpriten nga një personazh digjital i quajtur “Muçi”, i veshur me elemente të kostumit tradicional shqiptar. Mesazhi i tij hyrës është: “Përshëndetje! Unë jam Muçi, asistenti juaj për tatimet”.
Përmes kësaj zgjidhjeje, synohet që bizneset të kenë një kanal më të drejtpërdrejtë komunikimi me administratën, veçanërisht për çështjet që lidhen me zbatimin e legjislacionit tatimor, procedurat administrative dhe detyrimet që duhet të përmbushin.
Në praktikë, bizneset përballen shpesh me paqartësi lidhur me deklarimet periodike, pagesën e tatimeve, faturimin elektronik, regjistrimin apo ndryshimin e të dhënave të aktivitetit, si dhe interpretimin e dispozitave të ndryshme fiskale.
Një asistent virtual mund të shërbejë si pikë e parë orientimi për këto problematika, duke reduktuar nevojën për komunikime të përsëritura me administratën apo për paraqitje fizike pranë strukturave të saj.
Megjithatë, mbetet për t’u parë se sa prej këtyre çështjeve do të mund të trajtohen drejtpërdrejt nga “Muçi” dhe në cilat raste tatimpaguesit do të duhet të vijojnë komunikimin me punonjësit e administratës.
Një element i rëndësishëm i shërbimit është identifikimi i detyrueshëm përmes platformës e-Albania. Ndryshe nga një faqe e zakonshme informimi, ku pyetjet mund të bëhen pa identifikim, përdorimi i këtij asistenti kërkon hyrjen në llogarinë personale të përdoruesit.
Kjo krijon mundësinë për një komunikim të lidhur me identitetin elektronik të tatimpaguesit, por nga ndërfaqja e publikuar nuk bëhet e qartë nëse asistenti ka akses në të dhënat individuale tatimore të biznesit apo nëse ofron vetëm përgjigje të përgjithshme informative.
Digjitalizimi i komunikimit me tatimpaguesit merr rëndësi të veçantë në një periudhë kur bizneset përballen me ndryshime të shpeshta ligjore dhe procedurale. Diskutimet për Paketën Fiskale 2027, ndryshimet e propozuara në tatimin mbi fitimin, TVSH-në dhe procedurat tatimore pritet të shtojnë nevojën për sqarime nga administrata.
Në këtë kontekst, një asistent virtual që jep përgjigje të shpejta, të sakta dhe të përditësuara mund të ndihmojë veçanërisht bizneset e vogla, të cilat jo gjithmonë kanë kapacitete të dedikuara për ndjekjen e ndryshimeve fiskale.
Nga ana tjetër, sfida kryesore mbetet cilësia e informacionit. Përgjigjet për çështje tatimore kanë pasoja të drejtpërdrejta financiare dhe ligjore, ndaj është e rëndësishme që informacioni i ofruar nga asistenti të jetë në përputhje me legjislacionin në fuqi dhe udhëzimet zyrtare.
Marrë nga Ekofin.al
