Në Rumani, qeveria pro-perëndimore është rrëzuar. Mocioni i mosbesimit kundër kryeministrit Ilie Bolojan u miratua me 281 vota pro. Kërkohej një shumicë prej 233 votash. Bolojani e përshkroi këtë lëvizje si “cinike dhe artificiale”.
Mocionin e mosbesimit e paraqiti grupi parlamentar i ekstremit të djathtë AUR, në koalicion me Socialdemokratët (PSD), të cilët deri kohët e fundit ishin pjesë e qeverisë.
Ata e justifikuan këtë mocion me kritikat e tyre ndaj politikës së kursimit të Bolojanit, si dhe me shitjen e pjesëmarrjes në kompani të mëdha shtetërore të planifikuar nga qeveria e tij.
PSD-ja deklaroi se Bolojani nuk kishte “zbatuar asnjë reformë të vërtetë” gjatë dhjetë muajve të mandatit të tij. Rumania ka nevojë për një kryeministër që është “i aftë të bashkëpunojë”.
Bolojani e akuzoi PSD-në në Parlament se po i kundërshtonte masat e kursimit që më parë i kishin mbështetur zyrtarisht. Bolojani theksoi se, veçanërisht, planet për privatizime të pjesshme kishin acaruar PSD-në sepse, si pasojë, elektorati i saj do të kishte humbur privilegjet.
Vendimi tani i takon Presidentit Dan
Presidenti Nicusor Dan tani duhet të propozojë një kandidat të ri për postin e kryeministrit në Parlament. Nëse Parlamenti refuzon dy propozime radhazi, kreu i shtetit mund të shpërbëjë Parlamentin dhe të thërrasë zgjedhje të parakohshme. Kjo mund të çojë në një bllokim politik që zgjat disa javë në këtë shtet anëtar të BE dhe NATO-s.
Dani e kishte komentuar situatën në Rumani në kuadër të takimit të Komunitetit Politik Evropian që u mbajt në Armeni. Pavarësisht rezultatit të mocionit të mosbesimit, Rumania do të ruajë kursin e saj pro-evropian, siguroi ai.
Marrë nga Tagesschau.de
