Administrata e presidentit Donald Trump po kërkon të krijojë një koalicion ndërkombëtar për të rikthyer lundrimin në Ngushticën e Hormuzit, ndërsa trafiku i anijeve në këtë rrugë ujore jetike mbetet i bllokuar për shkak të përplasjes SHBA-Iran.
Duke cituar një kabllogram të brendshëm të Departamentit të Shtetit të dërguar në ambasadat amerikane, gazeta raportoi se Washingtoni u ka kërkuar diplomatëve të tij të nxisin qeveritë e huaja që t’i bashkohen një aleance të re të quajtur “Ndërtimi i Lirisë Detare” (Maritime Freedom Construct), e cila do të koordinojë shkëmbimin e informacionit, përpjekjet diplomatike dhe zbatimin e sanksioneve për të rihapur ngushticën.
“Pjesëmarrja juaj do të forcojë aftësinë tonë kolektive për të rikthyer lirinë e lundrimit dhe për të mbrojtur ekonominë globale”, thuhet në kabllogram, sipas lajmit.
Më tej thuhet se një zyrtar i lartë i administratës e ka konfirmuar propozimin si një nga mjetet diplomatike dhe politike në dispozicion të presidentit.
Nisma vjen disa javë pasi Trump e shpalli ngushticën “plotësisht të hapur dhe gati për biznes”, ndërsa trafiku i anijeve ka mbetur kryesisht i bllokuar.
Irani ka tentuar të vendosë mina dhe të sulmojë cisterna që kalojnë në këtë rrugë pa miratimin e Teheranit, ndërsa SHBA-ja ka vendosur bllokadë ndaj të gjitha anijeve që shkojnë drejt ose vijnë nga portet iraniane.
E ardhmja e Ngushticës është bërë një pikë kyç në negociatat e bllokuara për paqe, ndërsa Trump thuhet se u ka kërkuar bashkëpunëtorëve të përgatiten për një bllokadë të zgjatur derisa Irani të pranojë të heqë dorë nga programi i tij bërthamor.
Marrë nga Wall Street Journal
