Presidenti i SHBA-së, Donald Trump, kërcënoi sërish dje se do të rrisë tarifat për mallrat nga India, për shkak të blerjeve të naftës nga Rusia. Ndërsa, Nju Delhi e quajti deklaratën e tij “të pajustifikuar” dhe u zotua të mbrojë interesat e veta ekonomike, duke thelluar përçarjen tregtare mes dy vendeve.
Në një postim në rrjetet sociale, Trump shkroi:“India jo vetëm që po blen sasi të mëdha nafte ruse, por më pas, për pjesën më të madhe të naftës së blerë, e shet atë në tregun e hapur për fitime të mëdha. Nuk u intereson se sa njerëz në Ukrainë po vriten nga Makineria Ruse e Luftës.”
“Për shkak të kësaj, unë do ta rris ndjeshëm tarifën që India i paguan SHBA-së”, shtoi ai.
Në përgjigje, një zëdhënës i Ministrisë së Jashtme të Indisë deklaroi se vendi do të “ndërmarrë të gjitha masat e nevojshme për të mbrojtur interesat e saj kombëtare dhe sigurinë ekonomike”.
“Synimi i Indisë është i pajustifikuar dhe i paarsyeshëm”, shtoi zëdhënësi.
Trump njoftoi gjithashtu se nga e premtja do të vendos sanksione të reja ndaj Rusisë dhe ndaj vendeve që vazhdojnë të blejnë energji nga Moska, nëse Rusia nuk ndërmerr hapa për t’i dhënë fund luftës së saj 3-vjeçare me Ukrainën.
Ndërkohë, presidenti rus Vladimir Putin nuk ka dhënë asnjë shenjë publike për të ndryshuar qëndrimin e tij, pavarësisht afatit të caktuar nga SHBA-ja.
Marrë nga NBC News
