Shoqata që përfaqëson agjencitë imobiliare, NAREA, reagoi ashpër ndaj kontrolleve të Administratës Tatimore dhe lajmeve të shpërndara nga kjo e fundit. Përmes një njoftimi të shpërndarë për mediat NAREA, tha se po ndjek me shqetësim situatën e krijuar për mënyrën se si Tatimet po ushtrojnë kontrollet dhe informacionet e pavërteta që po shpërndajnë publikisht.
“Dënojmë me çdo kusht demonizimin e një sektori të tërë, që i ofron oportunitete biznesi rreth 1’500 agjentëve të cilët kryesisht nëpërmjet vetëpunësimit krijojnë të ardhura për veten dhe familjet e tyre. Profesionistë, të cilët si rrjedhojë e kërkimit të lajmit të bujshëm artificial dhe të kërkimit të klikimit me çdo kusht, sot vuajnë pasojat e kësaj fushate denigruese,” deklaroi NAREA.
Shoqata theksoi se ka komunikuar rregullisht me institucionet qendrore të qeverisë dhe të inteligjencës financiare në lidhje me sfidat e industrisë Real Estate dhe të Profesionit të Ndërmjetësit të Pasurive të Paluajtshme.
“Paqartësia e ndjekur nga klima e krijuar gjatë ushtrimit të kontrolleve, e shoqëruar me mediatizimin pa pritur projekt-raportet dhe rezultatet tyre, vet kjo fushatë, ndikon negativisht në perceptimin e publikut mbi rolin dhe detyrat e agjentit, cënon imazhin e tij, frymën e bashkëpunimit si dhe bën të pamundur luajtjen e rolit të garantuesit të parë në zinxhirin e transaksioneve, nga ana e Ndërmjetësve të Licencuar të Pasurive të Paluajtshme,” tha NAREA.
Dy ditë më parë Tatimet shpërndanë një njoftim zyrtar për mediat për kontrolle të ushtruara në 9 agjenci imobiliare, ku sipas administratës ishin konstatuar shkelje të rënda të ligjit, përfshirë evazion me cmimin e shitjes së pronave.
Marrë nga Kapitali.al
