Një aksident i rëndë automobilistik është regjistruar këtë të diel në Itali ku kanë humbur jetën dy të rinj shqiptarë.
Sipas mediave të huaja ngjarja ka ndodhur në unazën jugore të Bergamos, ku një mjet tip “Mercedez Benz” është përplasur me një furgon dhe për pasojë kanë humbur jetën tre persona, mes tyre dy të rinj me origjinë shqiptare.
Viktimat janë Klinton Sala, 23 vjeç, drejtues i Mercedes-it, dhe Denis Cana, 21 vjeç pasagjer në mjet. Të dy ishin miq dhe po udhëtonin së bashku. Viktima e tretë është Oscar Angioletti, 62 vjeç nga Zanica (Bergamo), i cili ndodhej në furgon me vëllain e tij 64-vjeçar, që mbeti i plagosur rëndë.
Sipas hetimeve paraprake të karabinierëve, Mercedes-i ka tentuar të parakalojë një makinë tjetër në një zonë me vijë të dyfishtë të vazhdueshme, duke hyrë në krahun e kundërt dhe u përplas drejtpërdrejt me furgonin.
Në vendngjarje ndërhynë ekipet e emergjencës, zjarrfikësit dhe policia rrugore. Seksioni i rrugës ku ndodhi ngjarja u mbyll për disa orë për hetime.
Marrë nga Botasot.info
