Anija “Lissus” P-133 e Forcës Detare Shqiptare që shërben në mision ndërkombëtar, ka shpatuar 25 emigrantë afganë dhe sirianë, në ujërat e detit Egje. Operacioni është kryer në bashkëpunim dhe me Rojen Bregdetare Turke.
“Lissus” P-133 zhvilloi një operacion kërkim-shpëtimi (SAR), i cili falë veprimit të shpejtë dhe bashkëpunimit në kohë u përmbyll me sukses, duke siguruar shpëtimin dhe transportin e tyre drejt autoriteteve përgjegjëse.
Gjatë patrullimit, një nga efektivët e anijes shqiptare konstatoi gomonen me emigrantë të nisur nga brigjet turke, duke ndërhyrë menjëherë për t’u ardhur në ndihmë.
Në bord ndodheshin gjithsej 25 persona me kombësi afgane dhe siriane, 8 meshkuj, 9 femra dhe 8 fëmijë. Operacioni i shpëtimit në bashkëpunim dhe me Rojen Bregdetare Turke është përmbyllur me sukses dhe emigrantët janë shpëtuar të gjithë.
“Ky është një tjetër dëshmi e përkushtimit të Forcës Detare për të garantuar sigurinë e jetës në det dhe forcimit të bashkëpunimit me partnerët ndërkombëtarë”, shkruan Forca Detare.
Sipas “Marine Traffic”, anija Patrulluese LISSUS P133 ndodhet aktualisht në Detin Egje dhe është patrullues që lundron nën flamurin e Shqipërisë. Gjatësia e saj e përgjithshme është 42.8 metra dhe gjerësia e saj është 6.8 metra.
Marrë nga Newsbomb.al
