Gazetarja Klodiana Lala ka dhënë detaje të reja lidhur me hetimet e SPAK ndaj ish-zëvendëskryeministres Belinda Balluku. E ftuar në News24, Lala tha se Prokuroria e Posaçme po verifikon dyshime për pasuri që dyshohet se mund të jenë fshehur jashtë vendit.
Sipas gazetares, në kuadër të hetimit është dërguar një letërporosi dhe ka pasur shkëmbim informacioni lidhur me një pasuri në Itali.
“SPAK po verifikon dyshimet për disa pasuri që dyshohet se janë fshehur jashtë vendit. Ka një letërporosi dhe shkëmbim informacioni në lidhje me një pasuri atje. Nuk dihet nëse është vilë apo jo”, deklaroi Lala.
Ajo theksoi se verifikimet janë ende në proces dhe se nuk është e qartë natyra e pasurisë për të cilën është kërkuar informacion nga autoritetet italiane.
“Nëse rezulton se ka një pasuri edhe në Itali, situata bëhet më serioze për Ballukun”, u shpreh gazetarja.
SPAK vijon hetimet ndaj Ballukut, ndërsa në qendër të vëmendjes janë edhe verifikimet mbi pasuritë dhe transaksionet që mund të lidhen me çështjen.
Më herët mediat kanë raportuar se prokurororët e SPAK në bashkëpunim me homologët italianë, kanë zbuluar një pasuri tjetër të Ballukut në një nga vendet më eksluzive të bregdetit të Italisë.
Bëhet fjalë për një vilë luksoze në Sardenjë, e cila dyshohet se i përket asaj, por është kamufluar në emrin e personave të tjerë. Ende nuk ka një konfimrim zyrtar nga SPAK për këtë çështje.
Marrë nga News24
