Pas një ndeshjeje të parë historike që prodhoi plot nëntë gola, rekord për një gjysmëfinale të UEFA Champions League, kampionët në fuqi të Paris Saint-Germain mbërrijnë në Mynih me një avantazh minimal 5-4 ndaj Bayernit, duke e bërë sfidën e kthimit një përballje të hapur dhe elektrizuese.
Skuadra bavareze, e drejtuar nga Vincent Kompany, ishte në prag të dorëzimit në ndeshjen e parë, kur po humbte 5-2, por reagimi në fund i ka mbajtur gjallë shpresat për një tjetër finale, që do të ishte e 12-ta në historinë e klubit. Megjithatë, statistikat nuk janë në anën e tyre: Bayerni ka fituar vetëm një nga tetë përballjet europiane kur ka humbur ndeshjen e parë me një gol diferencë dhe ka dështuar në pesë gjysmëfinalet e fundit me sistem vajtje-ardhje.
Gjithsesi, “Allianz Arena” mbetet një fortesë e vërtetë. Bayerni ka humbur vetëm një nga 29 ndeshjet e fundit në shtëpi në Champions (23 fitore, 5 barazime), ndërsa këtë sezon ka fituar gjashtë ndeshjet në këtë kompeticion, duke shënuar nga katër gola në secilën prej tyre në fazën me eliminim direkt.
Nga ana tjetër, Luis Enrique dhe PSG synojnë të shkruajnë histori duke u bërë skuadra e parë franceze që arrin tri finale të Champions-it. Forma e tyre është mbresëlënëse: 13 fitore në 16 ndeshjet e fundit me eliminim direkt. Parizienët janë gjithashtu skuadra me më shumë gola këtë sezon në kompeticion (43) dhe synojnë fitoren e tretë radhazi në transfertë ndaj skuadrave gjermane.
Historia i favorizon francezët edhe në një aspekt tjetër: PSG është kualifikuar në 14 nga 17 rastet kur ka fituar ndeshjen e parë me një gol diferencë. Një tjetër sukses do t’i bënte kampionët në fuqi ekipin e parë që arrin finalen si mbrojtës titulli që nga sezoni 2017/18.
Në përballjet direkte, Bayerni kishte fituar pesë ndeshje radhazi ndaj PSG-së para humbjes së fundit, ndërsa në Mynih ka triumfuar në pesë nga shtatë përballjet e fundit ndaj francezëve. Në përgjithësi, gjermanët kanë dominim ndaj skuadrave franceze, me 14 fitore në 17 ndeshjet e fundit.
Vëmendja do të jetë edhe te protagonistët kryesorë. Harry Kane vazhdon formën e jashtëzakonshme, duke shënuar 17 gola në 16 ndeshjet e fundit në Champions dhe duke u bërë anglezi i parë që realizon në gjashtë ndeshje radhazi. Nga ana tjetër, Khvicha Kvaratskhelia është arma kryesore e PSG-së, me shtatë gola në gjashtë ndeshjet e fundit dhe gjithsej dhjetë këtë sezon, duke barazuar rekordin e Zlatan Ibrahimović-it.
Sa u përket mungesave, Bayerni mund të rikuperojë Lennart Karl, ndërsa PSG do të jetë pa Achraf Hakimin, me Nuno Mendes në dyshim.
Me një avantazh minimal dhe dy skuadra që shquhen për sulm të fuqishëm, gjithçka mbetet e hapur. Një tjetër spektakël është pothuajse i garantuar, ndërsa një vend në finale pret vetëm njërën prej këtyre gjiganteve europiane.
Marrë nga Syri.net
