Administrata Tatimore ka bërë publike pagat indikative për sektorin e ndërtimit dhe u bën thirrje tatimpaguesve të sigurojnë deklarimin korrekt të pagave, për të shmangur kontrollet e thelluara dhe masat administrative që parashikon ligji.
Apeli u drejtohet të gjithë biznesmenëve dhe ndërtuesve të sektorit, që të bëjnë deklarimin e plotë dhe të saktë të pagave, duke pasur parasysh informalitetin dhe deklarimin e pagesës mujore, sepse një pjesë vazhdon të jepet ende nën dorë.
Në kuadër të planit sektorial të ndërtimit dhe për të luftuar informalitetin në pagat e punonjësve, fokusi i Administratës Tatimore nga dhjetori 2025 e në vijim do të jetë ndërtimi, kryesisht në:
– Subjektet që deklarojnë paga më të ulëta se pagat indikative të publikuara nga Tatimet;
– Subjektet kur ndryshimi i profesionit përdoret për të ulur artificialisht nivelin e pagës.
Institucioni ka publikuar dhe listën e plotë të pagave indikative për sektorin e ndërtimit, nga Sanitar që është 600 mijë lekë të vjetra, pra më e ulta, më pas bojaxhinjtë dhe pllakaxhinjtë, me 850 mijë dhe 900 mijë lekë, deri tek Arkitektët, drejtuesit e mjeteve të rënda dhe Menaxherët.
Për vlerësimin e riskut të tatimpaguesve që shmangin pagesën reale të pagave të punonjësve, analiza do të ketë si element krahasues pagat indikative të profesioneve në sektorin e ndërtimit sipas tabelës së mëposhtme.
Administrata Tatimore thotë se çdo tatimpagues që pagën e punonjësit të tij të deklaruar, për profesionet e sipërpërmendura ose të ngjashme me to, do ta ketë nën nivelin e pagës indikative, dhe që ndryshon profesionin me qëllim kategorizimin në pagën më të vogël do të konsiderohet me risk dhe do të jetë objekt kontrolli nga strukturat e specializuara të Tatimeve.
Marrë nga Newsbomb.al
