Nën justifikimin se Porti Detar Durrës nuk ka mundësi financiare, administrata e një prej institucioneve me qarkullim më të lartë financiar në vend nuk përmbushi detyrimin për të paguar shpërblimet e fundvitit për punonjësit.
Por, nga ana tjetër, drejtuesit e Autoritetit Portual Durrës kanë miratuar rritjen e ndjeshme të pagave të tyre. Në një denoncim të mbërritur në adresën e “Boldnews.al”, thuhet se drejtori aktual i Portit Durrës, Kreshnik Bajraktaraj, ka miratuar rritjen e pagesës së tij nga 250 mijë lekë të reja në 340 mijë lekë të reja, pra 90 mijë lekë të reja.
Sipas denoncimit, një rritje të ndjeshme pagash është miratuar edhe për një grup të vogël drejtuesish, kryesisht ata që menaxhojnë tenderat në Autoritetin Portual të Durrësit.
“Drejtor Kreshnik Bajraktari ka punësuar disa njerëz të tij nga Tirana dhe u ka rritur rrogën, duke u dhënë pagesë më të lartë se paraardhësit e tyre”, thuhet në denoncimin e mbërritur në adresën e redaksisë .
Më tej, denoncuesi thotë se punonjësit e Portit të Durrësit marrin vetëm 60 mijë lekë rrogë në muaj, ndërkohë që administrata e këtij institucioni të rëndësishëm “është mbushur me familjarë, nipër e mbesa të funksionarëve të Partisë Socialiste, duke nisur që nga djali i kryetarit të PS-së, Durrës, e me radhë”.
Kjo frymë e “rritjes së pagave për drejtorët” duket është e mbartur që nga koha, kur Autoriteti Portual i Durrësit drejtohej nga Pirro Vëngu, aktualisht Ministrës i Mbrojtjes.
Denoncuesi deklaron se “edhe drejtori që u bë Ministër, Pirro Vëngu, e kishte mendjen për të rritur pagën e tij. Ai e kishte rrogën 170 mijë lekë të reja dhe e ngriti në 250 mijë. Ndërkohë, ne të tjerët shohim se si fryjnë xhepat shefat”.
Në fund të mesazhit të tij, denoncuesi kërkon mirëkuptimin e redaksisë që emri i tij të mbetet anononim, “pasi për atë rrogë 60 mijë lekë punoj dhe nuk dua ta humbas nga hakmarrja e drejtuesve”.
Marrë nga Boldnews.al
