Elbasani, një nga qytetet më të mëdha në vend, po përballet prej vitesh me një tkurrje të vazhdueshme të popullsisë, ndërsa treguesit financiarë dhe të aktivitetit ekonomik po japin sinjale gjithnjë e më të dobëta për ritmin e zhvillimit lokal.
Të dhënat më të fundit të Bankës së Shqipërisë të konsultuara nga Skyweb.al, tregojnë se në fund të vitit 2025 është vërejtur një rritje e përgjithshme e përdorimit të pagesave elektronike në vend, e reflektuar nga shtimi i terminaleve POS.
Ky trend tregon një zhvendosje drejt pagesave pa para në dorë dhe formalizimit të ekonomisë.
Megjithatë, në Elbasan rritja ka qenë minimale. Numri i terminaleve POS është rritur nga 446 në vitin 2023 në 665 në vitin 2024 dhe vetëm në 685 në vitin 2025, një rritje shumë më e ulët krahasuar me rajone të tjera.
Për krahasim, në Gjirokastër terminalet POS u rritën nga 1 206 në 2023 në 4 519 në 2025, ndërsa në Lushnjë nga 536 në 2023 në 2 594 në 2025, duke reflektuar zgjerim shumë më të shpejtë të aktivitetit ekonomik dhe pagesave elektronike.
Edhe treguesit e infrastrukturës së parasë cash mbështesin të njëjtën panoramë.
Numri i bankomateve në Elbasan është rritur nga 45 në vitin 2023 në 55 në 2024, por ka rënë sërish në 49 në vitin 2025, duke treguar një ritëm të dobët investimi dhe një treg me aktivitet të kufizuar krahasuar me qytetet ku infrastruktura bankare po zgjerohet.
Në këtë kontekst, kombinimi i rënies demografike me ritmin e ulët të zgjerimit të infrastrukturës financiare po ushqen perceptimin se Elbasani po përjeton një ngadalësim të dukshëm ekonomik, në një kohë kur qytete të tjera po shfaqin dinamika shumë më të forta zhvillimi.
Marrë nga Skyweb.al
