Policia e Shtetit ka ardhur me një reagim zyrtar lidhur me megaoperacionin e zhvilluar në kryeqytet, ku u bë i mundur çmontimi e disa grupeve kriminale që merreshin me shitjen e “të bardhës” në zona të ndryshme të Tiranës.
Pas rreth tre muajsh hetime intensive, Seksioni për Hetimin e Narkotikëve, në bashkëpunim me Prokurorinë e Tiranës, finalizoi operacionin e koduar “Final”, duke goditur disa grupe që operonin paralelisht në shpërndarjen e lëndëve narkotike. Sipas të dhënave zyrtare, janë identifikuar gjithsej 36 persona të përfshirë, të cilët vepronin si individualisht, ashtu edhe në bashkëpunim me njëri-tjetrin.
Gjatë aksionit u ekzekutuan masat e sigurisë “arrest në burg” për 15 prej tyre, ndërsa 16 të tjerë janë shpallur në kërkim dhe po punohet për kapjen e tyre. Ndërkohë, pesë persona të tjerë janë arrestuar më herët gjatë fazës hetimore.
Janë arrestuar shtetasit: Arsen Shahollari, Ilir Baruti, Visar Alla, Xhemal Gjoka (Boja), Jurgent Ibrahimi, Ermond Osmani, Aljon Çezma, Abdulla Gega, Klevin Nika, Albi Çela, Saimir Duraj, Edison Mera, Eris Hoxha, Emra Idrizi dhe Glerjan Hoxhalli.
Operacioni ka çuar edhe në sekuestrimin e një sasie të konsiderueshme lëndësh narkotike dhe pasurish të dyshuara si të përfituara nga aktiviteti kriminal. Konkretisht, janë gjetur mbi 60 kilogramë cannabis, rreth 2 kilogramë kokainë, si dhe armë zjarri, përfshirë një pistoletë dhe tre armë gjahu. Po ashtu, janë sekuestruar shuma të mëdha parash, 121 mijë euro, 60 milionë lekë dhe 5000 paundë, së bashku me celularë, pajisje të tjera dhe automjete që dyshohet se përdoreshin për këtë aktivitet.
Sipas hetimeve, rrjeti ishte i shtrirë në disa zona të Tiranës dhe funksiononte i organizuar, duke përdorur metoda të ndryshme për shpërndarjen e drogës. Autoritetet bëjnë me dije se puna vijon për kapjen e personave në kërkim dhe për dokumentimin e plotë të kësaj veprimtarie kriminale.
Marrë nga Newsbomb.al
