Greqia po përgatit një paketë të re ligjore për përdorimin e skuterave elektrikë, duke vendosur kufizime të forta pas rritjes së aksidenteve dhe përdorimit të pakontrolluar në qytete.
Sipas draftit që i referohen mediat greke, një nga ndryshimet kryesore është ndalimi i plotë i përdorimit të skuterave elektrikë nga të miturit në rrugët publike.
Autoritetet greke e konsiderojnë këtë masë të domosdoshme, pasi një pjesë e madhe e incidenteve përfshijnë përdorues të rinj pa pajisje mbrojtëse dhe pa njohuri të rregullave të qarkullimit.
Nisma është paralajmëruar nga ministri i Mbrojtjes së Qytetarëve, Michalis Chrysochoidis, ndërsa Ministria e Transportit po përshpejton përgatitjen e kuadrit ligjor përmes zëvendësministrit Konstantinos Kyranakis.
Sipas informacioneve, projektligji ndodhet në fazën përfundimtare dhe pritet të dalë për konsultim publik brenda dy javëve të ardhshme, me synimin për miratim të shpejtë më pas.
Paketa ligjore pritet të përfshijë gjithashtu gjoba më të larta administrative për shkelësit dhe për kompanitë që tregtojnë skuterë jashtë standardeve teknike të lejuara. Autoritetet do të intensifikojnë kontrollet, veçanërisht ndaj mjeteve që tejkalojnë shpejtësinë e lejuar ose që janë modifikuar në mënyrë të paligjshme.
Në fokus do të jenë edhe importuesit dhe tregtarët që dyshohet se shesin modele pa certifikimet e nevojshme të sigurisë, në një përpjekje për të vendosur kontroll më të rreptë në një treg që deri më tani ka funksionuar me pak rregulla.
Ndërkohë, problematika e skuterave elektrikë është kthyer edhe në një shqetësim të dukshëm në Shqipëri. Pavarësisht një urdhri të disa muajve më parë nga Ministria e Brendshme për kufizimin e përdorimit të tyre, në praktikë ky vendim nuk po zbatohet.
Në rrugët e Tiranës, skuterat janë rikthyer në qarkullim të lirë, shpesh pa rregulla dhe pa masa sigurie, duke krijuar rrezik për këmbësorët dhe drejtuesit e mjeteve dhe duke shtuar rastet problematike në trafikun urban.
Marrë nga Protothema.gr
