Eliminimi nga UEFA Champions League përballë Bodo/Glimt ka lënë gjurmë tek Interi, por sezoni i zikaltërve mbetet ende i hapur në dy fronte të rëndësishme: Coppa Italia dhe Serie A. Me një avantazh prej +10 pikësh ndaj Milan në kampionat, titulli duket shumë pranë, por kjo nuk pritet të shmangë ndryshime të thella gjatë verës.
Drejtuesit Beppe Marotta dhe Piero Ausilio kanë nisur prej kohësh planifikimin për një rifreskim të skuadrës. Në portë, e ardhmja e Yann Sommer duket larg Milanos, pasi kontrata e tij përfundon në qershor dhe rinovimi nuk është në horizont. Situata e Josep Martínez mbetet në pikëpyetje.
Në mbrojtje, pritet të mbyllet cikli për Francesco Acerbin, Matteo Darmian-in dhe Stefan de Vrij, duke i hapur rrugë një bërthame më të re me Manuel Akanji, Alessandro Bastoni dhe Yann Bisseck.
Në mesfushë, çështja më delikate lidhet me Hakan Calhanoglu, i kërkuar nga Galatasaray. Ndërkohë, pas më shumë se 170 paraqitjesh, aventura e Henrikh Mkhitaryan duket drejt fundit.
Oferta mund të shqyrtohen edhe për Denzel Dumfries, Davide Frattesi-n dhe Luis Henrique-n. Në repartin ofensiv, sakrifica e madhe mund të jetë Marcus Thuram, i vlerësuar rreth 60 milionë euro.
Paralelisht me lëvizjet në merkato, klubi synon të sigurojë vazhdimësinë në stol, duke rinovuar kontratën e trajnerit Cristian Chivu deri në vitin 2028, me opsion zgjatjeje edhe për një sezon tjetër. Një verë e nxehtë pritet në “Appiano Gentile”, pavarësisht nëse trofeu i kampionatit përfundon apo jo në duart e Interit.
Marrë nga Spoprtmediaset.it
