Kompania koncesionare e autostradës Milot–Morinë, “Albanian Highway Concession” (AHC), ka kërkuar rishikimin e tarifës së kalimit nga 5 në 8 euro, sipas një dokumenti që po qarkullon në rrjete sociale.
Rritja e kërkuar do të ishte 60 për qind, ndërsa autenticiteti i dokumentit dhe miratimi eventual i kërkesës nuk janë konfirmuar zyrtarisht.
Dokumenti paraqitet si një memo e Njësisë së Zbatimit të Projektit “Milot–Morinë”, pranë Ministrisë së Infrastrukturës dhe Energjisë së Shqipërisë, drejtuar ministrit Enea Karakaçi. Në të përmblidhen pretendimet e koncesionarit për rishikimin e tarifës dhe ndikimet financiare në detyrimet e ndërsjella sipas kontratës.
Sipas pjesës së fotografuar, AHC pretendon se tarifa e përdorimit të autostradës ka mbetur e pandryshuar që nga fillimi i operimit në vitin 2018, pavarësisht ndryshimeve të treguesve ekonomikë që, sipas kompanisë, duhet të merren parasysh për indeksimin e saj. Duke iu referuar klauzolës 11.4.4 të kontratës së koncesionit, kompania argumenton se tarifa duhet të rishikohet sipas formulës kontraktuale të indeksimit. Në përllogaritjet e paraqitura për datën 1 shtator 2026, indeksi rezulton 1,597, ndërsa tarifa e rishikuar propozohet të jetë 8 euro, me ekuivalentin prej 740 lekësh.
Koncesionari pretendon gjithashtu se moszbatimi i indeksimit ka krijuar diferenca ndërmjet të ardhurave të realizuara dhe atyre të parashikuara, duke ndikuar në likuiditetin dhe ecurinë financiare të koncesionit. Në dokument përmenden edhe efektet e ndryshimit të kursit të këmbimit, për të cilat kompania kërkon trajtim në rakordimin financiar ndërmjet palëve.
Tarifa bazë e publikuar nga Agjencia e Trajtimit të Koncesioneve, ATRAKO, është 5 euro me TVSH për veturat. Faqja zyrtare e agjencisë u referohet klauzolave 11.4.3 dhe 11.4.4 të kontratës për përllogaritjen e tarifave sipas kategorisë së automjetit.
Nëse tarifa për veturat do të miratohej në nivelin e kërkuar dhe do të zbatohej për çdo kalim, një udhëtim vajtje-ardhje do të kushtonte 16 euro, nga 10 euro sipas tarifës bazë prej 5 eurosh. Megjithatë, fotografitë e publikuara tregojnë vetëm pjesë të një memoje që përmbledh pretendimet e kompanisë. Ato nuk përmbajnë një vendim për miratimin e rritjes, ndërsa data dhe numri i protokollit nuk lexohen qartë.
Deri në konfirmimin zyrtar dhe publikimin e dokumentacionit të plotë, tarifa 8 euro mbetet një kërkesë e paraqitur në dokumentin që po qarkullon.
Marrë nga Reporteri.net
