Qytetarët ndaj të cilëve hapet një dosje përmbarimore do të mund të informohen tashmë elektronikisht përmes llogarisë së tyre në e-Albania. Shërbimi Përmbarimor Shtetëror ka prezantuar një shërbim të ri, që synon të përshpejtojë dhe të rrisë transparencën e komunikimit me personat që rezultojnë debitorë.
Sipas njoftimit, kur ndaj një qytetari hapet një dosje përmbarimore në një prej 22 Zyrave Vendore të Përmbarimit, ai do të marrë një njoftim elektronik në llogarinë personale në e-Albania.
Në këtë mënyrë, qytetari do të vihet në dijeni për ekzistencën e dosjes përmbarimore që lidhet me të, pa u mbështetur vetëm te format tradicionale të komunikimit.
Shërbimi i ri është pjesë e procesit të digjitalizimit të shërbimeve të Përmbarimit Shtetëror dhe synon që informacioni të mbërrijë te qytetarët në mënyrë më të shpejtë dhe të drejtpërdrejtë.
Njoftimi elektronik merr rëndësi të veçantë për debitorët, pasi u krijon mundësinë të njihen në kohë me faktin se ndaj tyre është hapur një procedurë përmbarimore dhe të ndjekin hapat e nevojshëm lidhur me çështjen.
Përmbarimi Shtetëror e paraqet këtë mekanizëm edhe si një mënyrë për të rritur transparencën në marrëdhëniet me qytetarët, duke përdorur e-Albania si kanal shtesë komunikimi për procedurat që i prekin drejtpërdrejt.
Me aktivizimin e shërbimit, çdo qytetar që rezulton debitor pranë një prej 22 zyrave vendore do të duhet t’u kushtojë vëmendje edhe njoftimeve që mbërrijnë në llogarinë e tij në e-Albania, pasi aty do të informohet për hapjen e dosjes përmbarimore.
Marrë nga Ekofin.al
