Çështja e radhës në themel në GJKKO ndaj kryebashkiakut të Tiranës, Erion Veliaj, dhe të pandehurve të tjerë është shoqëruar me mungesa dhe përplasje të forta mes palëve.
Kryebashkiaku Veliaj ka vijuar bojkotin dhe refuzimin e tij për të marrë pjesë fizikisht në sallë, për sa kohë që i mohohet kërkesa për të mos qëndruar në kafazin prej xhami.
Seanca është karakterizuar edhe nga mungesa e avokatit të tij, Plarent Ndreca, i cili ka paraqitur pamundësi objektive për shkak të një angazhimi në Gjykatën Civile të Tiranës.
Për shkak të kësaj mungese dhe mungesës së palës mbrojtëse në sallë, trupi gjykues ka vendosur shtyrjen e procesit.
Megjithatë, trupi gjykues e ka vlerësuar ndryshe sjelljen e avokatit Ndreca, duke i vendosur atij një gjobë prej 50 mijë lekësh pasi nuk kishte ngritur pretendime në seancën e kaluar për datën.
Në qendër të vëmendjes së seancës ishte edhe kërkesa e bashkëshortes së Veliajt, Ajola Xoxa, e cila kërkoi pezullimin me dy muaj të procesit duke paraqitur raport mjekësor pas lindjes me operacion.
Mbrojtja e Xoxës argumentoi se ajo nuk është në gjendje të ushtrojë në mënyrë efektive të drejtat e saj ligjore dhe të bëjë mbrojtjen në këtë gjendje.
Nga ana e saj, Prokuroria e Posaçme kundërshtoi ashpër kërkesën për pezullim, duke argumentuar se ligji parashikon vetëm shtyrje seance dhe se ajo nuk është paraqitur fizikisht asnjëherë në gjyq.
Trupi gjykues i GJKKO-së ka vendosur përfundimisht të rrëzojë kërkesën e Ajola Xoxës për pezullimin e afateve të procesit.
Marrë nga Dosja.al
