Një lokal do të jetë pjesë e një ndërtimi që do të realizojë qeveria në qendër të Ksamilit, në Sarandë. Projekti me vlerë 5.5 milionë euro përfshin një kullë vrojtimi si dhe një godinë funksionale.
Ndërtimi përfshin edhe një kafene me sipërfaqe të madhe, brenda strukturës që po ndërton shteti. Natyrshëm lind pyetja se kujt ia ka premtuar qeveria këtë kafene, duke qenë se Ksamili është një nga perlat e turizmit në Shqipëri.
Duket një histori e njohur në të gjitha projektet e Fondit Shqiptar të Zhvillimit, apo edhe të atyre lokale. Persona të afërt me pushtetin i marrin në administrim këto ndërtime.
Sipas dokumenteve, ndërtimi është quajtur “Qendra e Mikpritjes”, ndërkohë që zona e zhvillimit ndodhet në qytetin bregdetar të Ksamilit, Bashkia Sarandë, dhe përfshin një sipërfaqe trualli prej 4075 m² dhe sipërfaqe për zhvillim prej 2838 m².
Sipas tyre, kjo vendosje e privilegjuar ka ndikuar në konceptin arkitektonik të ndërtesës, duke përfshirë në dizajn jo vetëm funksionalitetin, por edhe estetikën e integrimit me natyrën dhe respektimin siluetës urbane të Ksamilit.
Sipas KKTU-së, në zonën e zhvillimit parashikohen funksione të integruara, si qendër komunitare me hapësira edukative, sociale dhe kulturore, një kullë vëzhgimi me funksione panoramike, rekreative dhe shërbimi. Gjithashtu edhe hapësira të gjelbra publike, shëtitore dhe tarraca të aksesueshme.
Në dokument theksohet se do të ketë kullë dhe katet e sipërme.
“Kulla e vëzhgimit është një strukturë vertikale simbolike që ngrihet në një lartësi maksimale prej 40.6 metrash. Në katet e saj ndodhen funksione të ndryshme si kati i katërt (96 m²) hapësira teknike dhe depo për barin. Kati i pestë (96 m²) lokal me pamje panoramike dhe urë lidhëse me çatinë e ndërtesës së komunitetit” thuhet në dokument.
Pra, me lekët e shtetit do të bëhet një tjetër lokal në një nga zonat më të bukura të Ksamilit. Tarraca e kullës do të ketë kopsht të gjelbër dhe pikë vëzhgimi me pamje mbi qytet, det dhe liqen.
Marrë nga VoxNess.al
