Teksa ndërtimet pa leje kanë pushtuar zonën turistike të Shëngjinit nga Rana e Hedhur e deri në Kune, përmes një skeme mafioze duke përdorur ligjin e vjetër, shifra të frikshme parash flitet se paguhen, për të blerë institucionet shtetërore dhe sistemin e drejtësisë siç është edhe Prokuroria e Lezhës.
Sipas të dhënave, kostoja për të siguruar mbrojtjen e institucioneve për të ndërtuar në Shëngjin ka arritur deri në 600 mijë euro, ku pjesa më e madhe e këtyre parave nën dorë shkojnë në Bashkinë Lezhë, pasi është institucioni kryesor për të dhënë miratimin e paprekshmërisë. Më pas vjen Këshilli i Qarkut i drejtuar nga Agron Ivani, i cili prodhon “lejen” duke përdorur ligjin e vjetër, për të vijuar me IKMT, policinë, prokurorinë dhe Agjencinë e Kadastrës e drejtuar nga Altin Gjergji, ku kjo e fundit finalizon të gjithë paligjshmërinë, duke legalizuar objektet për t’i bërë gati për shitje
Kjo veprimtari e paligjshme vijon prej gjashtë vitesh dhe këtë e dëshmojnë ndërtimet shumë kateshe që janë ngritur në Shëngjin dhe të tjera që janë në proces. Mjafton një verifikim dhe hetim i Strukturës së Posaçme Kundër Krimit të Organizuar dhe Korrupsionit SPAK dhe shumë persona mund të shkojnë pas hekurave, përfshirë zyrtarë lokal dhe njerëz të drejtësisë në këtë qytet.
Marrë nga Prapaskena.al
