“Të padëgjuar” – kjo është ajo që lexohet nga të gjitha rrëfimet e banorëve të fshatit Luz, të cilët ndodhen vetëm 20 minuta larg kryeqytetit, por duket se jetojnë në shekullin e kaluar.
Edhe pse në çdo fushatë elektorale është premtuar se rruga do të asfaltohet, ky premtim nuk është mbajtur.
Politikanët shfaqen në kohë votash, por gropat vijojnë të qëndrojnë, mandat pas mandati.
Banorët dhe përfaqësues të bizneseve aty pranë shprehen të revoltuar për shkak të gjendjes së rënduar të rrugës, e cila kalon përmes fshatit dhe e lidh atë me autostradën dhe pjesën tjetër të vendit.
Kamionët e tonazhit të rëndë e kanë bërë rrugën thuajse të pakalueshme. Edhe pse bëhet fjalë për vetëm pak kilometra, autoritetet ende nuk e kanë parë të “nevojshme” ndërhyrjen.
Shirat e vazhdueshëm e kanë përkeqësuar edhe më tej situatën, duke e bërë të vështirë edhe shkuarjen e fëmijëve në shkollë. Në verë, kalimi në këtë rrugë është i vështirë për shkak të pluhurit dhe gropave të mëdha, ndërsa sot balta e bën atë edhe më të pakalueshme.
“Në verë jemi të detyruar të mbajmë dyert dhe dritaret mbyllura për shkak të pluhurit, ndërsa në dimër na futet balta dhe akulli nëpër shtëpi”, rrëfen një banor.
Banorët thonë se kanë paraqitur ankesa të vazhdueshme dhe se të gjitha institucionet përkatëse janë në dijeni të situatës. U është premtuar se rruga do të rikonstruktohej dhe do të kthehej në gjendje normale që në muajin tetor, por deri më sot, në nisje të shkurtit, nuk ka pasur asnjë ndërhyrje.
Ata kërkojnë rikonstruksionin e plotë të rrugës dhe ndalimin e qarkullimit të kamionëve me tonazh të lartë, pasi kjo situatë përbën rrezik serioz për jetën e banorëve dhe veçanërisht për rreth 150 fëmijë të shkollës “Gjon Luka”, e cila ndodhet ngjitur me rrugën.
Sipas tyre, trotuaret janë të ngushta dhe lëvizja e nxënësve është tejet e rrezikshme.
Mbi 1 000 banorë vuajnë këtë situatë.
Protestuesit i bëjnë thirrje shtetit dhe institucioneve përgjegjëse të ndërhyjnë urgjentisht dhe të marrin masa konkrete për zgjidhjen e këtij problemi. Kjo është protesta e tretë e banorëve për gjendjen e mjerueshme në të cilën ndodhet rruga e këtij fshati.
Shqipëria po përballet prej kohësh me probleme serioze infrastrukturore, edhe pse paradoksalisht kjo është ministria që gëzon më shumë fonde se të gjitha të tjerat.
Marrë nga ACQJ [Albanian Center for Quality Journalism]
