Punonjësit e shërbimit në restorante mund të marrin më pak bakshish gjatë fundjavës, pavarësisht se këto janë zakonisht ditët me fluks më të madh klientësh.
Sipas një studimi të cituar nga “The Wall Street Journal”, klientët në restorante janë më pak bujarë me bakshishet të shtunave dhe të dielave, krahasuar me ditët e tjera të javës.
Studimi analizoi 68 milionë transaksione me kartë në 47 zinxhirë restorantesh që operojnë në 41 shtete të SHBA-së.
Të dhënat treguan se gjatë fundjavës klientët lënë deri në rreth 1 pikë përqindjeje më pak bakshish për kamerierët dhe stafin e shërbimit.
Sipas analizës, një nga arsyet kryesore lidhet me mënyrën si klientët shpenzojnë paratë gjatë fundjavës. Kur ata kanë më shumë shpenzime për aktivitete të tjera, si dalje, udhëtime të shkurtra, argëtim apo blerje, priren të ulin shumën që lënë si bakshish në restorante.
Gjetjet janë të rëndësishme sidomos për stafin e restoranteve, të ardhurat e të cilëve varen në masë të madhe nga bakshishet. Edhe një ulje e vogël në përqindje mund të ketë ndikim të ndjeshëm, veçanërisht në ditët kur volumi i punës është më i lartë.
Studimi tregon se sjellja e klientëve nuk ndikohet vetëm nga cilësia e shërbimit apo çmimi i faturës, por edhe nga ngarkesa e përgjithshme e shpenzimeve gjatë javës. Në këtë kuptim, fundjava, edhe pse sjell më shumë klientë në restorante, nuk përkthehet domosdoshmërisht në bakshishe më të larta për punonjësit e shërbimit.
Marrë nga Wall Street Journal
