Shtesa natyrore e popullsisë në Shqipëri mbeti pozitive gjatë vitit 2025, por me një ritëm më të ulët krahasuar me një vit më parë.
Sipas të dhënave më të fundit, gjatë vitit 2025 në vend u regjistruan 22.541 lindje dhe 21.394 vdekje. Kjo do të thotë se popullsia pati një shtesë natyrore prej 1.147 personash, pra lindjet ishin më të larta se vdekjet.
Megjithatë, treguesi mbetet në rënie krahasuar me vitin 2024. Gjatë vitit 2025, lindjet ranë me 3,3%, ndërsa vdekjet u ulën me 3,2%.
Edhe pse të dy treguesit shënuan rënie, tkurrja e lindjeve vijon të mbetet një nga sinjalet më të ndjeshme të zhvillimeve demografike në vend.
Pamja ndryshon në tremujorin e parë të vitit 2026, kur shtesa natyrore kaloi në territor negativ.
Në tre muajt e parë të vitit u regjistruan 5.146 lindje dhe 5.514 vdekje, duke rezultuar në 368 vdekje më shumë se lindje.
Kjo do të thotë se, të paktën në fillim të vitit 2026, popullsia është tkurrur natyrshëm, pa llogaritur ndikimin e emigracionit.
Megjithatë, krahasuar me të njëjtën periudhë të vitit 2025, tremujori i parë i këtij viti shfaq disa lëvizje pozitive. Lindjet u rritën me 1%, ndërsa vdekjet ranë me 7,4%.
Pavarësisht këtij përmirësimi relativ, bilanci mbetet negativ për shkak se numri i vdekjeve vazhdon të jetë më i lartë se ai i lindjeve.
Të dhënat konfirmojnë se Shqipëria vijon të përballet me një presion të fortë demografik, ku plakja e popullsisë, emigracioni dhe ulja e lindshmërisë mbeten faktorët kryesorë që ndikojnë në tkurrjen e bazës së popullsisë.
Marrë nga Skyweb.al
