Vendi ynë është bërë qesharak në raport me vendet e rajonit apo ato të Bashkimit Europian, pasi nismat për kontrollin e territorit me satelitë apo fotografi nga hapësira, veçse kanë rënduar arkën e shtetit. Fillimisht u hap tenderi me vlerë mbi 7 milionë euro për të ngritur dy satelitë, të cilët do të monitoronin pyjet, zjarret, ndërtimet pa leje apo edhe do të kontrollonin zaptimin e hapësirave në plazhe.
Deri më sot s’kemi parë sesa efikase kanë qenë këto tendera në Shqipëri, sa i kanë ndihmuar autoritetet shtetërore, apo sa i kanë ardhur në ndihmë edhe njerëzve të thjeshtë, të cilët në këto kohëra kanë parë vetëm projekte të shumta të zaptimit të hapësirave të mëdha nga qeveria.
Dhe kur menduam se këto marrëzi kishin marrë fund, ja ku vjen një tjetër projekt tepër i dyshimtë i institucioneve shtetërore. Agjencia Kombëtare e Zonave të Mbrojtura ka hapur një tender me objekt “pyllëzime në shkallë të gjerë nëpërmjet mbjelljes precize me dronë”.
Një nismë e padëgjuar jo vetëm në Shqipëri, por edhe në vendet më të përparuara, teksa gjatë këtyre kohëve kemi parë jo mbjellje të pemëve, por masakrimin e pyjeve, e për rrjedhojë rrëshqitje masive. Sëpata s’ka kursyer as zona të mbrojtura, pasi me apo pa leje, pyjet në Shqipëri po rrafshohen dita – ditës.
Sipas dokumenteve, Agjencia Kombëtare e Zonave të Mbrojtura do të shpenzojë 500 milionë lekë të vjetra për këtë nismë, e cila nuk dihet sesa efikase do të jetë. Nëse do të ketë të njëjtin fat si satelitët apo fotografitë, koha do të tregojë nëse bëhet fjalë për propagandë apo për punë konkrete.
Marrë nga VoxNews.al
