Prokurori i Përgjithshëm Olsian Çela ka ngritur alarmin për një rritje të ndjeshme të krimeve ndaj jetës dhe rasteve të dhunës në familje në të gjithë vendin. Në raportin e tij vjetor në Kuvend mbi gjendjen e kriminalitetit për vitin 2024, kryeprokurori vë theksin pikërisht te krimet kundër jetës.
Sipas të dhënave zyrtare të bëra publike nga ai, vrasjet me dashje janë rritur 3.1 herë, duke kaluar nga 14 raste në vitin 2023 në 44 raste në vitin 2024. Po ashtu, vrasjet me paramendim janë dyfishuar, nga 15 në 31 raste.
Më i prekur mbetet qarku i Tiranës, ku janë regjistruar rreth 30% e të gjitha krimeve kundër jetës, pasuar nga Korça, Durrësi dhe Lezha. Ndërkaq, dhuna në familje vijon të jetë një fenomen shqetësues me 1,656 procedime penale të regjistruara gjatë vitit 2024, një rritje prej 18.6% krahasuar me vitin paraardhës. Numri i të pandehurve për këtë vepër ka arritur në 1,238, me rritje 14.8%.
Raporti evidenton gjithashtu se 88.9% e kërkesave të prokurorëve për masa sigurimi në rastet e dhunës në familje ishin për arrest, duke reflektuar një ashpërsim të politikës penale ndaj autorëve të këtyre veprave. Prokuroria e Përgjithshme nënvizon se këto shifra kërkojnë ndërhyrje të koordinuara ligjore dhe sociale, për të parandaluar dhunën dhe për të mbrojtur më mirë kategoritë vulnerabël të shoqërisë.
Marrë nga Newsbomb.al
