Popullsia e Shqipërisë vijon të tkurret, teksa vendi humbi rreth 27,400 banorë gjatë vitit 2025 dhe zbriti në 2.33 milionë banorë më 1 janar 2026, sipas të dhënave të publikuara nga INSTAT, duke konfirmuar vazhdimësinë e prirjes së rënies demografike të nxitur kryesisht nga emigracioni dhe plakja e popullsisë.
Ndërkohë, vitin e kaluar popullsia e vendit rezultoi në 1.36 milionë banorë, duke regjistruar këtë vit një rënie prej 1.16%.
Rënia e popullsisë është ndikuar kryesisht nga emigracioni, i cili edhe gjatë vitit 2025 mbeti negativ. Sipas INSTAT, migracioni neto rezultoi me -28.531 persona, ndërsa shtesa natyrore e popullsisë mbeti pozitive, me 1,147 lindje më shumë se vdekje. Megjithatë, kjo nuk ka qenë e mjaftueshme për të frenuar tkurrjen demografike të vendit.
Të dhënat tregojnë gjithashtu se popullsia shqiptare po plaket. Mosha mediane është rritur nga 44.3 vjeç në 45 vjeç, ndërsa raporti i varësisë së të moshuarve është rritur nga 33.3% në 35.7%, duke reflektuar një barrë gjithnjë e më të madhe për popullsinë në moshë pune.
Në nivel rajonal, Tirana mbetet i vetmi qark që ka shënuar rritje të popullsisë, me 0.7% krahasuar me një vit më parë. Në krahun tjetër, tkurrja më e madhe është regjistruar në qarqet e Kukësit dhe Shkodrës, me përkatësisht 2.59% dhe 2.56% më pak banorë.
Tirana vazhdon të jetë qarku më i populluar në vend, duke përqendruar rreth 32.8% të popullsisë totale. Pas saj renditen Fieri, Elbasani dhe Durrësi, të cilët mbajnë peshën më të madhe në shpërndarjen gjeografike të banorëve në Shqipëri.
Marrë nga Scantv.al
