Në Salcë-Kozare të Kuçovë, 28 hektarë sera dhe 60 hektarë toka bujqësore janë ende të mbuluara nga uji. Fermerët thonë se prodhimi i sezonit është shkatërruar plotësisht, ndërsa kafshë dhe shpendë shtëpiake kanë ngordhur. Uji ka arritur deri në 1 metër brenda serave gjatë ditëve të përmbytjeve. Tashmë niveli ka rënë, por janë shkatërruar të gjitha kulturat bujqësore që ishin në fazën e vjeljes.
“Jemi të shkatërruar. Të gjitha të mbjellat janë shkatërruar, si domate, speca kastraveca. Kërkojmë dëmshpërblim nga shteti, përndryshe do shkojmë drejt falimentimit”, shprehet një fermer.
Fermerët apelojnë për ndihmë shtetërore, ndërsa cikli i prodhimit mund të rifillojë vetëm pas 3-4 muajsh, kur toka të thahet.
“Ne na duhen para për t’i mbjellë sa më shpejt serat. Sapo kishim dalë në prodhim ndaj dhe humbjet janë të mëdha”, theksojnë ata.
Fermerët kërkojnë dëmshpërblim financiar për kulturat bujqesore furnizim urgjent me ushqim për bagëtitë, pastrimin dhe riparimin e kanaleve kulluese dhe gjetjet e një zgjidhje për shkarkimet e HEC-it të Banjës, që sipas tyre është shkaktari kryesor i përmbytjeve.
Marrë nga Kapitali.al
