‘Telenovela’ e emigrantëve në Gjadër, mbërrin anija që do të marrë mbrapsht 43 shtetas

Përditësimi i fundit: 1 Shkurt, 2025 2:45 pm

118 Shikime

2 Min. Leximi

Autoritetet italiane dhe shqiptare janë vënë menjëherë në lëvizje për zbatimin e vendimit të Gjykatës së Apelit të Romës, në lidhje me emigrantët.

Anija e Rojës Bregdetare Italiane ka mbërritur në Portin e Shëngjinit, për marrjen e 43 emigrantëve, të cilët po qëndrojnë në Kampin e Gjadrit prej ditës së martë. Ata pritet të sillen në Shëngjin dhe të nisen menjëherë drejt Italisë.

Gjykata e Apelit e Romës pezulloi vendimin për kthimin e 43 emigrantëve nga Bangladeshi dhe Egjipti të dërguar në kampin e Gjadrit. Hera e tretë që kjo ndodh që kur janë hapur kampet në Shqipëri, ndërsa pritet vendimi i Gjykatës Evropiane që do të shprehet përfundimisht për çështjen e vendeve të sigurta më 25 shkurt.

Mediat italiane raportuan se Komisioni i Azilit, pasi shqyrtoi kërkesat për mbrojtje ndërkombëtare të 43 emigrantëve në Gjadër, arriti në përfundimin se shumica e kërkesave ishin “dukshëm të pabazuara”. Vetëm një individ u vlerësua si i cenueshëm dhe do të vazhdojë procedurën për azil sipas rregullave të zakonshme.

Disa organizata dhe grupe politike kanë ngritur shqetësime të forta për mënyrën se si po trajtohen azilkërkuesit në Itali. Përfaqësues të Tryezës së Azilit dhe Emigracionit kanë theksuar se praktikat e përdorura nuk përputhen me ligjin ndërkombëtar dhe atë europian, duke akuzuar autoritetet italiane për refuzim të drejta të azilkërkuesve dhe për mungesë mbrojtjeje ligjore për ta.

Marrë nga Top Channel