FIFA, organi botëror i futbollit ka përditësuar paraditen e së enjtes renditjen e ekipeve kombëtare për muajin tetor 2024. Shqipëria ngjitet me dy pozicione dhe mban vendin e 65-të, ndërsa edhe Kosova ka ngjitur tre shkallë duke qenë në vendin 101. Ndërkohë Argjentina vijon të jetë në krye, me kampionët e botës në fuqi që ndiqen nga Franca. Bie në sy ngjitja e Italisë me një pozicion dhe qëndrimi i Gjermanisë dhe Kroacisë jashtë dhjetë ekipeve më të mira kombëtare në botë.
Shqipëria dhe Kosova
Dy ndeshjet e fundit të Kombëtares (humbja me Çekinë dhe fitorja me Gjeorgjinë) kanë bërë që kuqezinjtë të fitojnë dy pozicione në renditjen botërore. Tanimë tanët mbajnë vendin e 65-të duke lënë pas vetes emra si Gjeorgjia, Finlanda, Islanda, Maqedonia e Veriut apo Mali i Zi.
Ndërkohë, kombëtarja shqiptare luan kundër Çekisë dhe Ukrainës më 16 dhe 19 nëntor në ‘Air Albania’ dy ndeshjet e fundit në Grupin B1 dhe është në garë për kreun e tabelës.
Dhjetë vendet e para
Në krye të ekipeve më të mira kombëtare vijon të jetë Argjentina me 1883 pikë, ndjekur nga Franca me një diferencë të madhe. Ndërkohë që më pas vijnë Spanja, Anglia, Brazili dhe Belgjika. Një pozicion ka fituar Portugalia dhe Italia, teksa Holanda dhe Kolumbia kanë rënë me një vend. Edhe pse ka fituar dy pozicione nga paraqitjet e fundit, Gjermania është jashtë dhjetëshes më të mirë dhe për momentin mban vendin e 11-të në botë.
