Një nga stadiumet në Marok ku do të luhen ndeshjet e Kupës së Botës në vitin 2030 do të quhet “Hassan i Dytë” dhe do të jetë më i madhi në botë! Maroku, një nga tre vendet që do të presë aktivitetin më të madh në Botë të futbollit, ka publikuar projektin e parë të një stadiumi futbolli me 115,000 vende të sapo projektuar. Stadiumi do të vendoset në Benslimane, një qytet 40 kilometra larg Casablancas.
Dizajni i këtij objekti futbolli i ka rrënjët në kulturën marokene dhe të kaluarën e tij. Ai ka një strukturë me mbulesë transparente si tendë, e mbajtur nga disa shtyllat në qoshe, duke krijuar një efekt të veçantë që lidhet me peisazhin natyror të zonës.
Maroku së bashku me Spanjën dhe Portugalinë do të jetë vendi pritës i disa prej ndeshjeve të Botërorit të 24-të. Krahas tyre, në 100-vjetorin e Botërorit të parë do të luhen ndeshje në Uruguai, Argjentinë dhe Paraguaj. Do të marrin pjesë 48 ekipe, të cilat do të luajnë në 20 stadiume.
