Shoqata Kombëtare e Ndërmjetësve të Pasurive të Paluajtshme ka shprehur shqetësim mbi zvarritjen e trajtimit në komisionet parlamentare të nismës së deputetes Blerina Gjylameti për rivlerësimin e pronave.
Përmes një deklarate për shtyp, NAREA bën me dije se tregu i rishitjes së pasurive të paluajtshme është pranë një kolapsi për shkak të paqartësive dhe mungesës së vendimmarrjes për fillimin e procesit të rivlerësimit me 5% brenda muajit shtator 2024, sikurse u deklarua publikisht nga kryeministri Edi Rama.
Sipas shoqatës kjo situatë ka dhënë efekte në tregun imobiliar duke filluar me mungesën e transaksioneve, në procedurat pezull pranë zyrave noteriale, në mungesën e performancës së sektorit financiar si dhe në mungesën e arkëtimit të ardhurave në arkën e shtetit.
Sipas NAREA, për 9 muajt e parë të 2024, janë arkëtuar më pak se 2% e të ardhurave nga Tatimi mbi Fitimin Kapital, duke sjellë një gropë prej 56 milionë Euro.
NAREA bën thirrje për zhbllokimin e kësaj situate, duke theksuar se Ministria e Financave dhe Këshilli i Ministrave, duhet të kenë një vëmendje të zgjeruar ndaj rreziqeve që po i kanosen industrisë.
Pak ditë më parë Kapitali publikoi lajmin se qeveria e ka pezulluar miratimin e ligjit për rivlerësimin me argumentin se do të rrisë cmimet e referencës në të gjithe territorin e Shqipërisë, ashtu si bëri në Tiranë. Kjo e shtyn miratimin e draftit për pas zgjedhjeve të vitit të ardhshëm.
