Policia ekuadoriane njoftoi, se ka arrestuar në Spanjë dy drejtues bandash të akuzuar për planifikimin e sulmit të armatosur në stacionin televiziv TC, janarin e kaluar. Atyre iu gjetën dokumente të falsifikuara.
“Comandante Willy”, lideri i supozuar i bandës Los Tiguerones dhe vëllai i tij, Alex, për të cilin autoritetet besojnë se ishte i dyti në komandë në organizatën kriminale, u arrestuan gjatë një operacioni të përbashkët me milicinë spanjolle, thotë policia ekuadoriane në një post në platformën X (ish Twitter).
Autoritetet ekuadoriane nuk i kanë publikuar emrat e të akuzuarve për akuza penale, por raportet thonë se të arrestuarit janë William dhe Alex Alcivar.
Sipas policisë, ata akuzohen për bomba në makina, kontrata me vdekje, zhvatje, si dhe planifikimin e sulmit të armatosur në studiot e rrjetit televiziv TC në qytetin e Guayaquil.
Sulmi i armatosur në studio është transmetuar drejtpërdrejt për rreth 20 minuta. Shikuesit u ngrinë kur panë 13 burra me kapuç që po futeshin të armatosur rëndë në setin e serialit. Askush nuk u vra dhe nuk u plagos dhe 13 personat e armatosur u arrestuan gjatë ndërhyrjes së një forca të fuqishme policie.
