Partia në pushtet “Rusia e Bashkuar” është shpallur fituesja e pritur e zgjedhjeve parlamentare treditore në Rusi. Sipas vlerësimeve të para, partia që ka qenë në pushtet për më shumë se dy dekada fitoi 57.5 përqind të votave. Ende nuk dihet nëse Rusia e Bashkuar e Presidentit Putin do të ruajë shumicën aktuale prej dy të tretash.
Forca e dytë do të jenë komunistët me 13.6 përqind të votave, e ndjekur nga Partia Liberale Demokratike e Rusisë (LDPR) e krahut të djathtë populiste me 9.2 përqind. Partia e Popullit të Ri mori pak më pak se tetë përqind të votave dhe Një Rusi e Drejtë 5.1 përqind.
Kjo do të thotë se të gjitha partitë e mëparshme parlamentare do të arrijnë të rihyjnë në Dumë. Rezultatet përfundimtare të zgjedhjeve, sipas kryetares së Komisionit Qendror të Zgjedhjeve, Ela Pamfilova, do të dihen të premten (25 shtator) më së shpejti.
Vetëm partitë besnike ndaj Kremlinit në zgjedhje
Të gjitha partitë që morën pjesë në zgjedhje janë besnike ndaj Kremlinit dhe mbështesin luftën e Rusisë kundër Ukrainës. Votimi, të cilin kritikët e autoriteteve e quajnë farsë, shihet si një konfirmim i rëndësishëm i politikës së luftës të udhëheqësit të Kremlinit, Vladimir Putin.
Dhjetëra veteranë lufte kandiduan për Rusinë e Bashkuar. Partia u përball me fushatën e saj më të vështirë zgjedhore deri më tani për shkak të një krize të rëndë ekonomike, lodhjes nga lufta dhe pakënaqësisë së qytetarëve.
Përpjekje për manipulim dhe mbikëqyrje
Forcat e opozitës që mbështesin paqen nuk u lejuan të merrnin pjesë në zgjedhje. Nikolai Rybakov, udhëheqësi i partisë Jabloko, së cilës fillimisht iu lejua të merrte pjesë, por më vonë u hoq nga lista e votimit, e anuloi në mënyrë demonstrative fletën e tij të votimit. Ai më parë u kishte bërë thirrje mbështetësve të partisë të bënin të njëjtën gjë.
Si Jabloko ashtu edhe komunistët tradicionalisht të fortë u ankuan se vëzhguesit e tyre u penguan të kontrollonin votimin në qendrat e votimit në qindra raste.
Autoritetet ruse flasin për sulme kibernetike
Sipas vëzhguesve të pavarur të zgjedhjeve, në Shën Petersburg, të dhënat nga qendrat e votimit nuk përputheshin me numrin e votuesve, votat e të cilëve ishin regjistruar.
Fletë votimi të mbushura më parë thuhet se u filmuan duke u futur në kutitë e votimit në disa qendra votimi. Shërbimi rus i BBC raportoi se nëpunësit civilë në zonat provinciale votuan me detyrim.
Probleme me sistemin elektronik të votimit u raportuan në Moskënë ditën e fundit të votimit. Kryetarja e Komisionit Qendror të Zgjedhjeve, Pamfilova, tha se sistemi në kryeqytet kishte qenë cak i një sulmi kibernetik. Ajo nuk tha se kush ishte përgjegjës për sulmet.
Media e pavarur ruse SotaVision raportoi se votuesve të prekur nuk iu dhanë fletëvotime letre si alternativë. Në vend të kësaj, atyre iu kërkua të votonin nëpërmjet një terminali elektronik.
Leonid Volkov, një ish-ndihmës i ngushtë i politikanit të opozitës Alexei Navalny, i cili vdiq në burg në vitin 2024, shprehu dyshime se problemet e supozuara me sistemin e fletëvotimit në letër u shkaktuan qëllimisht për të inkurajuar më shumë njerëz të votonin në mënyrë elektronike. “Kërkoni një fletëvotim letre!” shkroi Volkov në platformën X.
Zgjedhjet edhe në Ukrainë
Këto ishin zgjedhjet e para të Dumës në Rusi që nga fillimi i luftës së Putinitkundër Ukrainës në shkurt 2022. Presidenti Putin u bëri thirrje qytetarëve të votojnë për të ndihmuar në fitore.
Sipas shifrave zyrtare, pjesëmarrja ishte më shumë se 56 përqind, më e lartë se në vitin 2021. Shifrat nga Komisioni Qendror i Zgjedhjeve i kontrolluar nga Kremlini nuk mund të verifikohen në mënyrë të pavarur.
Pavarësisht kundërshtimit nga Ukraina, zgjedhjet u mbajtën për herë të parë edhe në pjesë të rajoneve ukrainase të pushtuara nga Rusia, Luhansk, Donetsk, Zaporizhia dhe Kherson.
Në rajonin e Donetskut, ushtarë të armatosur mbikëqyrën futjen e fletëvotimeve në kuti. Zgjedhjet u mbajtën përsëri edhe në gadishullin e Krimesë në Detin e Zi, të cilin Rusia e aneksoi në vitin 2014.
Marrë nga Deutsche Welle
