Nju Jorku ka shfuqizuar një ligj mbi një shekull të vjetër që e bënte krim tradhtinë bashkëshortore, një shkelje që dikur mund t’i çonte tradhtarët në burg për tre muaj.
Guvernatorja Kathy Hochul të premten nënshkroi një projektligj që shfuqizonte këtë statut, i cili datonte që nga viti 1907 dhe prej kohësh konsiderohej i vjetruar dhe i vështirë për t’u zbatuar.
“Këto çështje duhet të trajtohen qartë nga individët dhe jo nga sistemi ynë i drejtësisë penale. Le të heqim përfundimisht këtë statut të çuditshëm dhe të vjetruar nga libri i ligjeve.”
Ligjet që ndalojnë tradhtinë bashkëshortore ekzistojnë në disa shtete dhe janë miratuar për ta bërë më të vështirë për t’u divorcuar në një kohë kur vërtetimi i tradhtisë bashkëshortore ishte mënyra e vetme për të marrë një ndarje ligjore.
Akuzat kanë qenë të rralla dhe dënimet edhe më të rralla. Disa shtete gjithashtu kanë ndërmarrë hapa për të shfuqizuar ligjet e tyre për tradhtinë në vitet e fundit.
Nju Jorku e përkufizonte tradhtinë si kur një person “kryen marrëdhënie seksuale me një person tjetër ndërkohë që ka një bashkëshort të gjallë, ose personi tjetër ka një bashkëshort të gjallë.”
Ligji i shtetit u përdor për herë të parë disa javë pasi hyri në fuqi, sipas një artikulli të New York Times, për të arrestuar një burrë të martuar dhe një grua 25-vjeçare.
Anëtari i Asamblesë Shtetërore, Charles Lavine, sponsorizues i projektligjit, tha se rreth një duzinë personash janë akuzuar sipas ligjit që nga vitet 1970, dhe vetëm pesë nga ato raste rezultuan me dënime.
“Ligjet janë krijuar për të mbrojtur komunitetin tonë dhe për të shërbyer si një parandalues i sjelljeve antisociale. Ligji për tradhtinë bashkëshortore i Nju Jorkut nuk përmbushi asnjë nga këto qëllime,” tha z. Lavine në një deklaratë të premten.
Ligji i shtetit u përdor për herë të fundit në vitin 2010, kundër një gruaje që u kap duke kryer një akt seksual në një park, por akuza për tradhti bashkëshortore u hoq më vonë si pjesë e një marrëveshjeje për pranimin e fajësisë.
Nju Jorku ishte afër shfuqizimit të ligjit në vitet 1960 pasi një komision shtetëror i ngarkuar me vlerësimin e kodit penal tha se ishte pothuajse e pamundur të zbatohej.
Në atë kohë, ligjvënësit fillimisht ishin në favor të heqjes së ndalimit, por përfundimisht vendosën ta mbanin pas argumentimit të një politikani se shfuqizimi i tij do të bënte të dukej sikur shteti po miratonte zyrtarisht tradhtinë bashkëshortore, sipas një artikulli të New York Times nga viti 1965.
Marrë nga Associated Press
