Gjykata Kushtetuese ka rrëzuar kërkesën e 4 familjarëve të ish-zv.kryeministrit Arben Ahmetaj, i cili ndodhet në arrati pasi është shpallur në kërkim ndërkombëtar nga SPAK.
Burime për mediat bëjnë me dije se Kushtetuesja nuk e ka kaluar në seancë plenare ankesën e katër familjarëve të ish-numrit dy të qeverisë Rama, të cilëve Prokuroria e Posaçme u ka sekuestruar telefona, USB, çelësa makinash si dhe pajisje kompjuterike.
Gjyqtarët e kanë konsideruar të pabazuar kërkesën e Eljona Hoxhës, Flamur Hoxhës, Teuta Hoxhës dhe Brunilda Menes, duke argumentuar më tej këtë vendim se materialet e sekuestruara janë marrë me dyshimet se aty “mund të gjejnë të dhëna të rëndësishme për hetimin”.
“Mbledhja e Gjyqtarëve, në bazë të nenit 31/a, pikat 1 dhe 2, shkronja “e”, të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, vendosi: Moskalimin e çështjes për shqyrtim në seancë plenare”, thuhet në fund të vendimit të marrë nga Gjykata më 19 Nëntor dhe i zbardhur së fundmi.
Në vendimin e Kushtetueses theksohet se Prokuroria dhe Gjykata kanë dhënë argumente të mjaftueshme dhe bindëse se përse janë sekuestruar sendet e personave të lartpërmendur, një pjesë e të cilave pas përfundimit të akt ekspertimit do t’u kthehen sërish pronarëve, ndërsa për pjesën tjetër do t’u verifikohet burimi, në kushtet kur vepra që po hetohet është ajo e pastrimit të parave.
Kujtojmë se Arben Ahmetaj prej një viti është shpallur në kërkim nga SPAK dhe akuzohet për shpërdorim detyre në lidhje me Inceneratorët.
Nga Zvicra ku ka aplikuar më azil, Ahmetaj ka refuzuar përballjen me drejtësinë shqiptare, duke thënë se procesi dhe provat janë manipuluar, për ta goditur atë politikisht. Ai ka thënë se do të përballet me drejtësinë vetëm kur ajo të jetë e drejtë dhe e vërtetë.
Atij me herët i janë sekuestruar 4 apartamente, si dhe dy llogari bankare të cilat arrijnë vlerën 124.300 Euro. Pasuri të cilën dyshohet se e ka përfituar falë marrëdhënies me pronarët e inceneratorëve Klodian Zoto e Mirel Mërtiri, që ndodhen gjithashtu po ashtu në kërkim.
Marrë nga Newsbomb.al
