Socialistë dhe demokratë kanë rënë dakord këtë të mërkurë gjatë mbledhjes së Komisionit të Medias, për ti kërkuar Këshillit Drejtues të ndërpresë procesin për zgjedhjen e Drejtorit të Përgjithshëm të Radio Televizionit Shqiptar.
Kjo lëvizje e Komisionit të Medias ka ardhur pas akuzave për paligjshmëri në procesin për zgjedhjen e kreut të RTSH-së.
Ashtu si dhe nuk ka ndodhur më parë demokratë e socialistë janë pozicionuar në të njëjtin krah dhe kërkojnë një garë të hapur dhe transparente.
Nënkryetarja e Komisionit të Medias, Evis Kushi tha socialistët do të angazhohen që kjo garë të jetë e drejtë, ndërsa nga ana tjetër kryetarja e këtij komisionit, demokratja Ina Zhupa tha se nëse Këshilli Drejtues nuk pranon ndërprerjen e kësaj gare, atëhere do të kërkojnë shkarkimin e anëtarëve.
“Jemi dakord, të përfshijmë në shkresë edhe faktin që këtë detyrim që i japim për të ndërprerë procesin, nëse nuk e zbatojnë, ne pala e opozitës (do të kërkojmë shkarkimin e tyre nga këshilli drejtues). T’ia vendosim që nëse nuk zbatojnë këtë kërkesë të komisionit ne do të jemi të detyruar të vazhdojmë me procedurën parlamentare të anëtarëve të këshillit të drejtimit
Të 5 që përfaqësojnë pakicën parlamentare në këshillin drejtues, jemi të gatshëm ti shkarkojmë, dhe ti kërkojmë kuvendit emërimin e të tjerëve në përputhje me ligjin, se është krijuar ideja në këshillin drejtues që ata s’kanë çfarë bëjnë se na kanë zgjedhur se s’do bien dakord me njëri tjetrin PS-PD dhe mendojnë se janë pronarë të fakto të RTSH”, tha Zhupa.
Kujtojmë se dy ditë më parë, Këshilli Drejtues skualifikoi nga gara disa prej kandidatëve që kishin konkurruar, duke lënë të vazhdojnë garën dy kandidatura, gazetari i Shkodrës Jetmir Shpuza dhe drejtoresha e komanduar e TVSH Aurora Polo.
Por pas reagimeve për mosrespektimin e procedurave, sidomos për kriterin e vjetërsisë në punë dhe shpalljen hapur të një vote të Mevlan Shanajt, që nuk gjendej në atë mbledhje, duket se ky proces është futur në një rrugë pa krye.
Marrë nga Newsbomb.al
